Qaraqalpaqstan Respublikası Ministrler Keńesiniń Baslıǵı F.Ermanov Qıtay mámleketinen kelgen “Datatek technology co.,ltd” “Datatek Group” kompaniyasınıń baslıǵı Ray Hung basshılıǵındaǵı delegaciyanı qabılladı.

Ushırasıwda tárepler respublikamızda jámiyetlik transport infrastrukturasın modernizaciyalaw, ekologiyalıq taza transport quralları, zamanagóy tólem sistemaların engiziw hám xalıqaralıq tájiriybelerdi jergilikli sharayatqa beyimlestiriw boyınsha óz-ara pikir alıstı.
Sonday-aq, delegaciya aǵzaları elimizde jámiyetlik transport tarawında alıp barılıp atırǵan reformalardı qollap-quwatlap, ózleriniń zamanagóy texnologiyalar hám finanslıq resurslar tiykarında iri joybarlardı ámelge asırıwǵa tayar ekenligin bildirdi.
Sóylesiwler dawamında eki tárepleme birge islesiw sheńberinde birinshi basqıshta zamanagóy avtobuslardı satıp alıw hám sanlı basqarıw sistemaların engiziw boyınsha birgeliktegi joybarlardı islep shıǵıw kórip shıǵıldı.
Bul ushırasıw eki tárepleme baylanıslardı bunnan bılay da bekkemlew, jámiyetlik transporttı zamanagóylestiriw hám xalıqqa qolaylıq jaratıwǵa xızmet etetuǵın áhmiyetli qádem boldı.

Qaraqalpaqstan xabar agentligi