Qaraqalpaqstan Respublikası Bajıxana basqarması baslıǵınıń orınbasarı O.Maxmadaliev “Xojeli” shegara bajıxana postında bolıp, post aymaǵında ámelge asırılıp atırǵan abadanlastırıw jumısları menen tanıstı.

Gúz máwsiminde bul jerge 1100 túp sayamanlı hám miyweli terek nálleri egilgen bolıwına qaramastan, aymaqtıń qıyın klimatlıq sharayatı hám jerdiń shorlanıwınan olardıń úlken bólegi kógermey qalǵanlıǵın atap ótiw kerek.
Sonlıqtan, basqarma basshıları tárepinen aymaqtı kóklemzarlastırıw hám ekologiyanı qorǵaw maqsetinde, zamanagóy agronomiyalıq usıllardan paydalanıw usınıs etildi.
Tereklerdiń túrleri hám olardıń ósiwi ushın zárúr sharayatlar jaratıw máseleleri dodalandı.
Sonday-aq, aymaqtıń qıyın ıqlım sharayatı, jeriniń jaǵdayınan kelip shıǵıp, oǵan say tereklerdi otırǵızıw hám jerge qayta islew beriw, dekorativ taslardan paydalanıw boyınsha usınıslar berildi.
Abadanlastırıw jumıslarına Qaraqalpaqstan Respublikası Abadanlastırıw basqarmasınıń qánigeleri de tartılıp, post aymaǵındaǵı shorlanǵan jerlerdi juwıw hám kóklemzarlastırıw, ónimdarlıǵın arttırıw boyınsha aldaǵı jumıslar kelisip alındı.
Topıraqlardıń shorın juwıwdan aldın, jerlerdi arnawlı texnikalıq qurallar járdeminde tolıq jumsartıw, tegislep suwǵarıw hám mákke, sudankalardı egiw arqalı gúz máwsimine terek nállerin egiwge tayarlaw boyınsha zárúr ilajlar kóriletuǵın boldı.

Á.Jiyemuratov,
Qaraqalpaqstan xabar agentligi