7-8-iyun kúni futbol boyınsha Ózbekstan Pro-ligasında 8-tur oyınları bolıp ótti.

Usı tur sheńberinde Nókistiń «Jayhun» komandası óz maydanında turnir jetekshisi Tashkenttiń «Lokomotiv» klubı menen ushırastı.
Oyın kútilgenindey keskin hám qızıqlı waqıyalarǵa bay bolıp, ushırasıwdıń 6-minutında «Jayhun» komandası oyınshısı Begis Kuwanıshbaev «Lokomotiv» dárwazasın anıq nıshanǵa aldı hám oyındaǵı esaptı ashıwǵa miyasar boldı.
Bunnan soń tashkentli futbolshılar da esaptı teńlestiriw ushın bir qatar hújimler shólkemlestirdi hám usınday hújimlerdiń birin qaytarıwda komandamız sárdarı Rashid Arazov qarsılas futbolshını shıǵanaǵı menen urıp toqtatıp qaldı hám oyın tóreshisi tárepinen qızıl kartochka menen jazalandı.
Ushırasıwdaǵı bul ústinlikten nátiyjeli paydalanǵan «Lokomotiv» klubı futbolshısı Muxriddin Zoirov 41-minutta «Jayhun» komandası dárwazasına gol urıp, ushırasıwdaǵı esaptı teńlestiriwge eristi.
Ekinshi taymdı nókisli futbolshılar da qáwipli hújimler menen basladı hám usınday hújimlerdiń birinde «Lokomotiv» klubı futbolshısı K.Hannanov futbolshımızdı qopallıq penen toqtatıp, oyın tóreshisi tárepinen ekinshi márte sarı kartochka menen jazalandı hám maydannan shetletildi.
Bunnan soń eki komanda aǵzaları da oyındaǵı esaptı ózgertiwge háreket etti. Biraq, olardıń bul háreketleri bosqa ketti hám oyın 1:1 esabı menen juwmaqlandı.
Al, respublikamızdıń bas komandası esaplanǵan «Aral» klubı bolsa, bul turda Ferǵana wálayatına sapar etip, Ferǵana mámleketlik universitetiniń «FARDU» komandasın 0:1 esabında jeńip shıǵıwǵa eristi. Ushırasıwdaǵı jalǵız goldı komandamız hújimshisi Zulpiqar Quwanıshbaev urıwǵa miyasar boldı.
Ótkerilgen 8-turdan soń Nókistiń «Aral» klubı 13 upay toplap turnir kestesinde 3-orındı iyelep kiyatırǵan bolsa, «Jayhun» komandası 8 upay menen 4-orındı iyelep tur.
Endi 9-turda «Aral» klubı Tashkenttiń «Olimpik» komandası menen, «Jayhun» «FARDU» ǵa qarsı saparda oyınlar ótkeredi.
Komandalarımızǵa áwmet yar bolıwın tilep qalamız.

Adilbay Orazov,
Qaraqalpaqstan xabar agentligi sholıwshısı