Qaraqalpaqstan Respublikasında 2025-jıldıń ótken 5 ayı dawamında Mámleketlik kadastrlar palatası basqarması jáne onıń aymaqlıq filialları tárepinen 26541 jer uchastkası hám kóshpes múlkke kadastr pasportı tayarlap berilgen. Bul haqqında Mámleketlik kadastrlar palatası Qaraqalpaqstan Respublikası basqarması xabar berdi.

Qosımsha etiliwishe, Qaraqalpaqstandaǵı 41 325 jer uchastkası hám kóshpes múlkke bolǵan huqıqlar mámleketlik diziminen ótkerilgen.
Sonday-aq, házirgi waqıtta Qaraqalpaqstan Republikasında jámi 476 165 dana kadastr hújjetleri arxivlerde saqlanbaqta. Sonnan, 472 384 hújjet elektron formatqa ótkerildi.
– 2025-jılı Tórtkúl, Beruniy, Ellikqala rayonlarında zamanagóy mobil stelajlar ornatılıp, Nókis qalası, Moynaq, Qońırat, Ellikqala rayonlarında arxiv kadastr hújjetlerin nomerler boyınsha qayta tártiplestiriw jumısların ámelge asırıw rejelestirilmekte,-deydi Mámleketlik kadastrlar palatası Qaraqalpaqstan Respublikası basqarmasınıń bas qánigesi Paraxat Ajimuratov.
Ózbekstan Respublikasınıń «Ózbasımshalıq penen iyelep alınǵan jer uchastkalarına hám olarda qurılǵan imarat hám obektlerge bolǵan huqıqlardı tán alıw haqqında»ǵı Nızamı 2024-jıl 8-noyabrde kúshke kirdi.
Usı Nızamǵa muwapıq, huqıqlardı tán alıw jumısların aymaqlar, máhálleler kesiminde basqıshpa-basqısh xatlawdan ótkeriw jolı menen ámelge asırıw belgilengen. Xatlaw jumısların shólkemlestiriw maqsetinde Kadastr agentligi tárepinen «ETIROF» málimleme sisteması islep shıǵılıp, xatlaw ótkeriletuǵın aymaqlardıń, máhállelerdiń reje-grafigi tastıyıqlandı hám járiyalandı.
Xatlaw jolı menen anıqlanǵan imarat hám kurılmalar haqqındaǵı maǵlıwmatlar «ETIROF» baǵdarlamasına kirgiziledi hám hár bir kóshpes múlk obekti boyınsha tiyisli ministrlik hám uyımlardan dúzilgen jumısshı topar juwmaqların beredi hám joqarıdaǵı imaratlar 2018-jıl 1-may halatına qurılǵan yaki kurılmaǵanlıǵı boyınsha kosmoslıq súwretler járdeminde analizlenedi.
Usı nızam tiykarında Qaraqalpaqstan Respublikası Joqarǵı Keńesiniń qararı menen Shımbay, Kegeyli, Taxtakópir, Qaraózek hám Ámiwdárya rayonlarındaǵı ózbasımshalık penen qurılǵan turaq jaylar hám artıqsha iyelengen jer maydanlarında qurılǵan kurılıs jáne imaratlarǵa qarap, 24 puqaranıń turaq jay hám jer uchastkalarına ijara hám múlk huqıqları tán alındı.
Házirgi waqıtta bul baǵdardaǵı jumıslar dawam ettirilip, kadastr qánigeleri tárepinen Qaraqalpaqstan Respublikasında 30 368 dana kóshpes múlk imaratı xatlawdan ótkerilip, 10 257 obekt «ETIROF» málimleme sistemasına kirgizildi.
Al, 1191 obekt haqkındaǵı maǵlıwmatlar kadastr.uz saytında hám mákan puqaralar jıyınları imaratlarında járiyalandı. 7583 dana obekt házirgi waqıtta dodalawda, 260 obekt Ádillik uyımları tárepinen úyrenilmekte, 341 dana kóshpes múlk qayta kórip shıǵılmaqta, 193 obekt iyeleriniń nızamda kórsetilgen bir mártelik tólemlerin tólewi kútilmekte hám 31 dana kóshpes múlk boyınsha huqıqların tán alıw ushın jergizikli keńeslerge dodalawǵa kirgizilgen.

Á.Jiyemuratov,
Qaraqalpaqstan xabar agentligi.