Beruniy rayonında Ózbekstan Respublikası Prezidentiniń 2024-jıl 30-dekabrdegi PQ-465-sanlı qararınıń orınlanıwın támiyinlew maqsetinde atız shetleri, kanallar, suwǵarıw hám kollektor-drenaj tarmaqlarınıń átirapındaǵı maydanlarda, xalıqtıń qıytaq jerleri, shańaraqlardıń hám kóp qabatlı turaq jaylardıń aldı hám máhálleniń ishki kóshelerinde awıl xojalıǵı ónimlerin jetistiriwdi shólkemlestiriw máselelerine baǵıshlanǵan seminar ótkerildi.

Onda Beruniy, Tórtkúl hám Ellikqala rayonlarınan Karantin agentligi, Fermerler keńesi hám basqa da bir qatar awıl xojalıǵı tarawı wákilleri, diyqan-fermerler hám qıytaq jer iyeleri qatnastı.
Ilajda usı qarardıń mazmun-mánisi, belgilengen jeńillikler túsindirilip, atız shetinen hám kollektor-drenaj átiraplarınan nátiyjeli paydalanıw, egilgen miywe nállerin hám palız eginlerin tárbiyalaw boyınsha da maǵlıwmatlar berildi.
Seminarda awıl xojalıǵı kooperaciyaların shólkemlestiriw hám júrgiziw, edu.karantin.uz platformasında oqıtıw arqalı xalıqtıń bántligin támiyinlew máseleleri haqqında da sóz etildi.
Prezident qararı tiykarında respublikamız rayonlarında atız shetlerindegi 905 gektar maydanǵa 890 mıń túp miyweli náller egiw rejesi tastıyıqlanǵan bolıp, sonıń ishinde, 453 gektar maydanǵa 385 mıń túp shiye, 91 gektar maydanǵa 77 mıń túp behi, 27 gektar maydanǵa 30 mıń túp júzim, 181 gektar maydanǵa 91 mıń túp jiyde, 154 gektar maydanǵa 308 mıń túp tut miyweli tereklerin egiw belgilengen.
Sonday-aq, suwǵarıw hám kollektor-drenaj tarmaqları átirapına reje tiykarında 99 gektar jerge 97 mıń túp miyweli nállerdi egiw prognoz etilip, atap aytqanda, 49 gektar maydanǵa 42 mıń túp shiye, 10 gektar maydanǵa 8 mıń túp behi, 3 gektar maydanǵa 3 mıń túp júzim, 20 gektar maydanǵa 10 mıń túp jiyde, 17 gektar maydanǵa 34 mıń túp tut miyweli nállerin otırǵızıw rejelestirilgen edi.
Búgingi kúnge kelip, Qaraqalpaqstan Respublikasında xojalıq júrgiziwshi subektler tárepinen atız shetleri, suwǵarıw kanalları hám kollektor-drenaj tarmaqları átirapındaǵı maydanlarǵa eksportqa mólsherlengen miyweli terek nálleri egilip, belgilengen reje tolıq orınlandı.
Sonıń ishinde, 2025-jılı Beruniy rayonında atız shetlerindegi 101 gektar maydanǵa hám suwǵarıw hám kollektor-drenaj átirapındaǵı 8 gektar maydanǵa miywe nálleri, palız eginleri, ovoщlar hám sobıqlı ósimlikler egilgen. Bul egilgen náller aymaqlarǵa biriktirilgen fitosanitariyalıq qadaǵalaw mámleketlik inspektorları tárepinen monitoringten ótkerilip, monitoring nátiyjeleri boyınsha maǵlıwmatlar “E-Fito” baǵdarlamasındaǵı “Atız qadaǵalawı” platformasına tolıq kirgizilip, dizimge alınǵan.

Á.Jiyemuratov,
Qaraqalpaqstan xabar agentligi.