Búgin Qaraqalpaqstan Respublikası tariyxı hám mádeniyatı muzeyinde Ózbekstan hám Qaraqalpapqstan xalıq artisti, qaraqalpaq xalqınıń tuńǵısh balerinasi Zamira Dawletmuratova tuwılǵanınıń 70 jıllıǵı múnásibeti menen «Ámiwdiń aqquwı» atlı eslew keshesi bolıp ótti.

Ilajǵa Z.Dawletmuratovanıń kásiplesleri hám zamanlasları qatnasıp, onıń dóretiwshiligi hám ómir jolı haqqında pikir-usınısları menen ortaqlastı. Hár bir aytılǵan sóz, eske alınǵan waqıya –biytákirar balerinanıń balet kórkem ónerine qosqan sheksiz úlesinen dárek berip turdı.
Dawletmuratova Zamira Turdımuratovna (1955-jıl 21-iyun – 2016-jıl 6-iyul) – Qaraqalpaqstannıń birinshi professional balerinası. Tashkent xoreografiya bilim jurtın hám A.Ya.Vaganova atındaǵı Leningrad bilim jurtın tamamlaǵan. 1975-jıldan Áliysher Nawayı atındaǵı Ózbek mámleketlik akademiyalıq opera hám balet teatrınıń balerinası bolıp jumıs islegen. 1999-jıldan teatr balet truppasınıń repetitorı bolǵan. Xalıqaralıq hám milliy balet tańlawlarınıń laureatı. Ol óziniń dóretiwshilik miynet jolında teatr saxnasında belgili shıǵarmalarda ıqlasbentlerine balet oyınların usınǵan. Bir neshe shákirtler tayarlap, dóretiwshilik jolınıń dawamlı bolıwına tiykar salıp ketken.
Eske túsiriw keshesine Qaraqalpaqstan Respublikası mádeniyat ministri B.Temirbaev qatnastı hám shıǵıp sóyledi.

Qaraqalpaqstan xabar agentligi