Sońǵı jıllarda Ózbekstan hám Qıtay arasında strategiyalıq sheriklik qatnasıqları keńeyip, kóplegen tarawlarda birge islesiw qatnasıqları rawajlanıp barmaqta. Sonıń menen birge, parlamentleraralıq qatnasıqlar tarawında da belgili bir kelisimlerge erisilmekte.

Qıtay Xalıq Respublikası Xalıqaralıq doslıq associaciyası baslıǵınıń orınbasarı Czyan Czyan Oliy Majlis Nızamshılıq palatasına keldi. Miymanlardı tómengi palatanıń Xalıqaralıq isler, qorǵanıw hám qáwipsizlik máseleleri komitetiniń baslıǵı Uluǵbek Shermatov kútip aldı. Bul haqqında Nızamshılıq palatasınıń baspasóz xızmeti xabar berdi.
Ushırasıwda sońǵı jılları mámleketlerimiz arasındaǵı doslıq hám barlıq sharayatlarda hár tárepleme strategiyalıq sheriklik qatnasıqları bekkemlenip atırǵanı ayrıqsha atap ótildi. Húkimetler, parlamentler, sırtqı siyasat hám tarmaq uyımları dárejesindegi baylanıslar sezilerli dárejede jedelleskeni, sawda-ekonomikalıq hám investiciyalıq birge islesiw jedel rawajlanıp atırǵanı atap ótildi.
Sóylesiw dawamında U.Shermatov miymanlarǵa jańa redakciyadaǵı Konstituciya hám “Ózbekstan – 2030” strategiyası sheńberinde ámelge asırılıp atırǵan reformalar, Nızamshılıq palatasınıń strukturalıq dúzilisi, onıń nızam dóretiwshiligi baǵdarındaǵı jumısı haqqında tolıq maǵlıwmat berdi.
Konstruktivlik hám óz-ara isenim ruwxında bolıp ótken sóylesiw waqtında eki mámleket arasındaǵı parlamentleraralıq baylanıslardı bunnan bılay da rawajlandırıw hám onı jańa basqıshqa alıp shıǵıw, óz-ara tájiriybe almasıw máseleleri dodalandı.

M.Komilova, ÓzA