Qıytaq jer dáramat dáregi bolıp, onnan ónimli paydalanıp, miynet etkenler shańaraǵına qosımsha dáramat tawıp, sap payda kórmekte. Álbette, bunıń ushın adam miynetten qashpay, jerdiń tilin birip, háreket etiwi kerek.

Ámiwdárya rayonı Almazar máhállesinde jasaytuǵın Baxtiyor Qalandarov 2018-jıldan berli shańaraqlıq ıssıxanasında miynet etip, ol arqalı dáramat alıp kelmekte. Taslandı halda jatırǵan 5 sotıx jer maydanında shólkemlestirilgen ıssıxanada búgin túrli palız eginleri jetistirilmekte. Shańaraqlı 4 adamnıń bántligi támiyinlenip, qıytaq jerden jaqsı dáramat alınıp atır.
Sonday-aq, ol pal hárreshilik jumısı menen de shuǵıllanadı. 25 pal hárre qutısı arqalı jetistirilgen pal ónimleri de shańaraqqa qosımsha dáramat dáregi. Isbilermenge Prezidentimiz tárepinen 2023-jıl 14-sentyabrde qabıl etilgen “Kishi biznesti rawajlandırıwdı qarjılay hám institucionallıq qollap-quwatlaw ilajları haqqında”ǵı qararı tiykarında 100 million kredit qarjısı ajıratılıwı shańaraqlıq isbilermenlik jumısın qollap-quwatlawǵa xızmet etken.
-Mámleketimizde isbilermenler hám fermerler ushın keń imkaniyatlar jaratılmaqta. Shańaraqlıq isbilermenlik jumısımız ushın alǵan kereditimiz, jumıslarımızdıń jaqsı rawajlanıwı ushın xızmet etpekte. Mine, qıytaq jerden jetistirgen ónimlerimizdi ishki bazarǵa satıp, alǵan qosımsha dáramatımızdı jaqsı kúnlerimzge jumsap atırmız. Sonday-aq, pal hárreshiligi menen de shuǵıllanıp, onnan tawıp atırǵan dáramatımız jaman emes. Pal densawlıqqa paydalı bolıwı menen birge, hárreler eginlerdiń, miywelerdiń gúllerin shańlandırıwda úlken áhmiyetke iye,-deydi Baxtiyor Qalandarov.

Qaraqalpaqstan xabar agentligi