Mámleketimizde awıl xojalıǵın rawajlandırıw, azıq-awqat qáwipsizligin támiyinlew hám turaqlı ekonomikalıq ósiwge erisiw maqsetinde xalıqaralıq birge islesiw baylanısları izbe-iz bekkemlenbekte.

Usı baǵdarda BMShtıń Azıq-awqat hám awıl xojalıǵı shólkemi (FAO) menen ámelge asırılıp atırǵan birge islesiw joybarları bir qatar áhmiyetli tarawlardı qamtıp alıp, awıllıq jerlerdegi potencialdı júzege shıǵarıw, resurslardan aqılǵa uǵras paydalanıw hám investiciyalıq ortalıqtı jaqsılawǵa xızmet etpekte.
Ekonomika hám qarjı ministrliginde BMShtıń Azıq-awqat hám awıl xojalıǵı shólkemi investiciya orayınıń direktorı Muhammad Mansuri basshılıǵındaǵı delegaciya wákilleri menen ótkerilgen ushırasıwda bul haqqında sóz boldı.
Ushırasıw waqtında tárepler awıl xojalıǵı, azıq-awqat qáwipsizligi, klimatqa beyim investiciyalar, turaqlı jer hám suw resurslarınan paydalanıw hám finans inklyuzivlik sıyaqlı tiykarǵı baǵdarlarda pikir alısıp, jańa baslamalardı dodaladı. Onda aymaqlar kesiminde bar ekonomikalıq potencialdı júzege shıǵarıw, infrastruktura imkaniyatların jaqsılaw arqalı jeke menshik sektor investiciyaların tartıw áhmiyetli másele bolıp esaplanadı.
Onda qatnasıwshılar awıl xojalıǵı hám suw resursların basqarıw baǵdarında iri strategiyalıq investiciyalıq rejelerdi ámelge asırıw zárúrligin atap ótti.
Bizge belgili, BMShtıń FAO shólkemi dúnyada azıq-awqat qáwipsizligin támiyinlew, ashlıqtı saplastırıw hám awıl xojalıǵın turaqlı rawajlandırıw maqsetinde jumıs alıp baratuǵın xalıqaralıq shólkem bolıp esaplanadı. Onıń Investiciya orayı bolsa aǵza mámleketlerde nátiyjeli joybarlardı islep shıǵıw hám ámelge asırıwǵa járdem berip kelmekte.
Táreplerdiń pikirine bola, resurslardan nátiyjeli paydalanıw, irrigaciya sistemaların modernizaciyalaw hám zamanagóy agrotexnologiyalardı engiziw arqalı ónimdarlıqtı arttırıw múmkin. Jergilikli islep shıǵarıwshılardıń xalıqaralıq bazarlarǵa shıǵıwın támiyinlew, logistika shınjırların rawajlandırıw hám eksportqa baǵdarlanǵan ónimlerdiń túrin keńeytiw de maqsetke muwapıq.
– FAO tárepinen Ózbekstanda ámelge asırılıp atırǵan joybarlar bir qatar áhmiyetli texnikalıq hám analitikalıq baǵdarlardı qamtıp alǵan. Sonıń ishinde, sawda boyınsha analitikalıq izertlewler, sharwashılıqtı rawajlandırıwda texnikalıq járdem, irrigaciya sistemaların modernizaciyalaw, klimatqa beyim regionallıq hám global baha shınjırların bekkemlew solardıń qatarına kiredi. Bul ushırasıw óz-ara birge islesiwdi jáne de bekkemlew hám áhmiyetli joybarlar boyınsha sóylesiwdi dawam ettiriwge jáne bir áhmiyetli qádem boldı, – dedi ministrliktiń basqarma baslıǵınıń orınbasarı Odil Usarov.

ÓzA