Berdaq atındaǵı Qaraqalpaq mámleketlik universitetinde elimizde qaraqalpaq tili hám ádebiyattanıw iliminiń rawajlanıwına óziniń salmaqlı úlesin qosqan ullı tulǵalardıń biri Ózbekstan hám Qaraqalpaqstan Respublikalarına xızmet kórsetken ilim ǵayratkeri, Berdaq atındaǵı mámleketlik sıylıqtıń laureatı, filologiya ilimleriniń doktorı, professor Srajatdin Axmetovtıń húrmetine baǵıshlanǵan «Professor Srajatdin Axmetovtıń ilimiy miyrası» atamasındaǵı eslew keshesi bolıp ótti.

Keshege universitet basshıları, Qazaqstan Respublikası Shaxmardan Esenov atındaǵı Kaspiy texnologiyalar hám injiniring universiteti prezidenti Berik Axmetov, ustazdıń shákirtleri, jaqınları hám ilimpazlar qatnastı.
Ilajdı universitet rektorı, akademik Axmed Reymov ashtı hám alıp bardı.
Keshede Qaraqalpaqstan Jazıwshılar awqamınıń baslıǵı K.Karimov, ilimpazdıń shákirti filologiya ilimleriniń doktorı, professor Q.Orazımbetov, fizika-matematika ilimleriniń doktorı, professor Q.Ismaylov hám basqalar shıǵıp sóylep, ilimpazdıń qaraqalpaq ádebiyattanıw iliminiń rawajlanıwına qosqan úlesi, filologiya iliminde tutqan ornı, jas áwlad tárbiyasındaǵı xızmetlerin ayrıqsha atap ótti.
Ilaj dawamında professor Srajatdin Axmetovtıń bay ilimiy miyrası, ilimiy maqalaları, monografiyaları, oqıw qollanbaları, sonday-aq, onıń tiltanıw, ádebiyattanıw, awdarma teoriyası hám kórkem pikirlewge baylanıslı izlenisleri haqqında tereń tallawlı pikirler bildirildi. Atap aytqanda, universitettiń filologiya fakulteti professor-oqıtıwshıları hám ilimiy izleniwshileri tárepinen professordıń ilimiy kózqarasları, onıń izbasarları jetilistirip bergen ilimiy mektebi haqqında sóz etildi.
Eslew keshesi dawamında professordıń ómiri hám jumısına baǵıshlanǵan kórgizbe shólkemlestirilip, onda onıń qoljazbaları, fotosúwretleri, ilimiy jumısları kórsetildi. Bul bolsa qatnasıwshılarǵa tek ǵana ilimiy emes, al adamgershilik pazıyletleri menen de itibarǵa erisken ustazdıń jarqın kelbetin jáne bir márte jaqınnan sáwlelendirdi dep ayta alamız.
-Usınday ushırasıw keshesi arqalı ullı ilimpazdıń bay ilimiy miyrası jáne bir márte eske alınıp ǵana qalmastan, al, jas áwlad qálbinde ustazǵa bolǵan húrmet hám sadıqlıq, ilimge bolǵan qızıǵıwshılıq jáne de artadı,-deydi ilimpazdıń shákirti filologiya ilimleriniń doktorı, professor Q.Orazımbetov. Álbette, bunday ilajlardıń ótkeriliwi elimizde ilim tarawı hám zıyalılardıń miyrasına bolǵan itibardıń ayqın kórinisi desek boladı.

Qaraqalpaqstan xabar agentligi