Búgingi kúnde global kólemde ekologiyalıq turaqlılıq, klimat ózgeriwine qarsı gúresiw hám qorshaǵan ortalıqtı qorǵaw máseleleri energetika tarawındaǵı áhmiyetli baǵdarlardan birine aylanǵan. Iri sanaat kompaniyaları óz jumısında ESG (ekologiya, jámiyet, korporativ basqarıw) principleri tiykarında turaqlı rawajlanıw maqsetlerin ámelge asırıwǵa ayrıqsha itibar qaratpaqta.

Usı kózqarastan, Ázerbayjan Respublikasınıń paytaxtı Bakude ótkerilgen dástúriy Baku energetika hápteligi sheńberinde ámelge asırılǵan ekologiyalıq baslama ayrıqsha áhmiyetke iye. Atap aytqanda, “Baku Expo” orayı aymaǵında ótkerilgen kóklemzarlastırıw akciyası dúnya energetikası hám neft-gaz tarawı qatnasıwshıları arasındaǵı sociallıq juwapkershilik hám qorshaǵan ortalıqqa abaylı qatnas belgisi bolıp esaplanadı.
Bul akciyada “Ózbekneftgaz” akcionerlik jámiyetiniń delegaciyası da belsene qatnasıp, terek hám gúller egiw arqalı ekologiyalıq háreketke óz úlesin qostı. Bul baslama sheńberinde dúnyanıń 50 ge shamalas mámleketinen kelgen delegaciyalardıń wákilleri qatnastı. Bul bolsa ekologiyalıq birge islesiwdiń xalıqaralıq kólemdegi áhmiyetin jáne de bekkemledi.
“Ózbekneftgaz” akcionerlik jámiyeti málimleme xızmetiniń basshısı Mwmin Ibodovtıń atap ótkenindey, ekologiyalıq turaqlılıqtı támiyinlew, jámiyet aldındaǵı juwapkershilikti arttırıw hám “jasıl” energetikaǵa ótiw jolındaǵı bunday baslamalar tek ǵana ámeliy áhmiyetke iye emes, al keleshek ushın taza ortalıq jaratıwǵa qaratılǵan háreketlerdiń úzliksiz dawamı bolıp esaplanadı.
Búgingi kúnde “Baku Expo” orayı aymaǵında “Ózbekneftgaz” AJ atınan terek hám gúller menen bezelgen arnawlı “jasıl múyesh” bar ekenligin aytıp ótiw orınlı. Bul kompaniyanıń tek ǵana ekonomikalıq hám texnologiyalıq potencialın emes, al jámiyet hám tábiyat aldındaǵı juwapkershiligin de kórsetedi. Bul arqalı “Ózbekneftgaz” AJnıń turaqlı rawajlanıwǵa bolǵan sadıqlıǵı, ESG principlerine ámel etken halda xalıqaralıq maydanda belsene qatnasıp atırǵanı jáne bir márte óz tastıyıǵın taptı. Bul ekologiyalıq baslama tek ǵana jasıl aymaqlardıń sanın arttırıw emes, al jámiyette ekologiyalıq mádeniyattı arttırıw, ekologiyalıq juwapkershilikti qáliplestiriw baǵdarında da áhmiyetli qádem bolıp xızmet etedi, – dedi ol.

ÓzA