Nókis qalasında sporttıń voleybol túrinen jaslar arasında «Bes baslama olimpiadası» jarısınıń Qaraqalpaqstan Respublikası basqıshı bolıp ótti.

Qızǵın bellesiwlerge bay bolǵan jarıs juwmaǵında, 16-21-jastaǵılar arasında birinshi orındı Moynaq rayonındaǵı Qazaqdárya elatınıń jasları jeńip alıwǵa miyasar boldı.
Al, sıylı ekinshi hám úshinshi orınlar Shımbay rayonındaǵı Qos terek awıl puqaralar jıyını menen Ámiwdárya rayonındaǵı Tosh yop awılı jaslarına nesip etti.
22-30 jas aralıǵındaǵı komandalar arasındaǵı jarıstıń finalında bolsa, Shımbay rayonındaǵı Taza jol elatınıń jasları qazaqdáryalı jaslardı jeńip shıǵıwǵa eristi.
Al, sıylı úshinshi orındı Qońırat rayonı Monshaqlı mákan puqaralar jıyını komandası qolǵa kirgizdi.
Jarıs juwmaǵında jeńimpaz komandalar shólkemlestiriwshiler tárepinen tayarlanǵan diplom hám estelik sawǵalar menen birge, jarıstıń Ózbekstan Respublikası basqıshına jollamanı qolǵa kirgizdi.

Adilbay Orazov,
Qaraqalpaqstan xabar agentligi sholıwshısı