Migraciya agentligi basshısı Behzod Musaev hám Italiyanıń Ózbekstandaǵı Ayrıqsha hám tolıq xuqıqlı elshisi Pergabriele Papadia de Bottini arasında ushırasıw bolıp ótti.

Sóylesiwde Italiyanıń bas ministri Jorja Meloni xanımnıń usı jıldıń 29-maydaǵı mámleketimizge rásmiy saparı sheńberinde qol qoyılǵan Migraciya hám mobillik haqqındaǵı kelisim memorandumınıń orınlanıwı hám onı ámeliyatqa engiziw máselesi dodalandı.
– Memorandum tariyxıy hújjet, onıń ústinde kóp islendi, kelisimdi tezirek turmısqa engiziw tárepdarımız, – dedi elshi Pergabriele Papadia de Bottini. – Migraciya áhmiyetli baǵdar sanaladı, Ózbekstan bolsa tarawdaǵı bay tájiriybesi menen Oraylıq Aziyadaǵı birge islesiwshiler ushın úlgi bola aladı.
Sonday-aq, Italiyada injenerlik, turizm hám awıl xojalıǵı sıyaqlı tarawlarda maman qánigelerge talap joqarı ekeni atap ótildi. Italiya tárepi 2026-jıldan baslap, ózbekstanlılarǵa 1 mıń 500 bos jumıs ornı ushın kvota ajıratılǵanın málim etti.
Házir Italiyada nızamsız statustaǵı Ózbekstan puqarasınıń joq ekenligi, birge islesiwdi jáne de ámelge asırıwǵa úlken túrtki bolatuǵının atap ótiw zárúr.

ÓzA