Buxara wálayatında ulıwma orta bilim beriw mektepleri hám kásip-óner bilimlendiriw orınları oqıwshıları arasında hár jıl sayın ótkerilip kiyatırǵan «Jas qutqarıwshı» kewilliler áskeriy-sport jarıslarınıń respublikalıq basqıshı ótkerildi.

Bul jarısqa mámleketimizdiń barlıq aymaqlarınan, sonıń ishinde Qaraqalpaqstan Respublikasınan da eki komanda qatnastı.
Qızıqlı ótken áskeriy-sport jarısı juwmaǵında, belgilengen shártlerdi talapqa say túrde orınlap, barlıq qarsılaslarınan ústin kelgen Nókis qalasındaǵı 1-sanlı politexnikumınıń «Jayhun» komandası professional bilimlendiriw oqıw orınları arasında birinshi orındı iyelewge miyasar boldı.
Al, ulıwma orta bilim beriw mektepleri arasında ótkerilgen bellesiwlerde bolsa, Beruniy rayonındaǵı 54-sanlı ulıwma bilim beriw mektebiniń «Madadkor» komandası sıylı 2-orındı iyelewge eristi.
-Ótken jılı ótkerilgen jarısta komandamız aǵzaları Qaraqalpaqstanda birinshi, Ózbekstanda ekinshi orındı iyelegen edi,-deydi Nókis qalasındaǵı 1-sanlı politexnikumı direktorı Mahmud Seytbekov.-Al, bıyıl bul jarısqa tayarlıqlardı jáne kúsheytip, birinshi orındı iyelewge eristik. Bizler bunnan oǵada quwanıshlımız.

Adilbay Orazov,
Qaraqalpaqstan xabar agentligi sholıwshısı.