Jaqında Qazaqastannıń Almatı qalasında erkin hám grek-rim gúresi boyınsha veteran sportshılar aarasında «Ardager alańı» atamasında xalıqaralıq turnir bolıp ótti.

Bıyıl úshinshi márte ótkerilip atırǵan bul abıraylı jarısqa Qazaqstannıń barlıq aymaqlarınan tısqarı, AQSh, Rossiya, Qırǵızstan hám Ózbekstannan pútkil dúnyaǵa belgili palwanlar kelip, jeńimpazlıq ushın óz-ara bellesti.
Quwanıshlı tárepi sonda, bul xalıqaralıq turnirde respublikamız palwanları da qatnasıp, bir qatar sıylı orınlardı iyelewge miyasar boldı. Atap aytqanda, 130 kg salmaqta eki gúres boyınsha da 56-60 jas arasındaǵı palwanlar arasında bellesiwlerge túsken Mars Baxiev eki altın, erkin gúres boyınsha jarısqa qatnasqan Keńesbay Sariev 51-55 jas aralıǵındaǵı palwanlar arasında 78 kg da, 46-50 jas aralıǵında Azat Mırzambetov 130 kg salmaq kategoriyasında bas sıylıqlardı jeńip alıwǵa miyasar boldı.
-1989-1997-jılları erkin gúres boyınsha Qaraqalpaqstan hám Ózbekstan chempionatlarında, bir qatar xalıqaralıq turnirlerde jeńimpazlıqtı qolǵa kirgizip, respublikamızdıń abırayın múnásip túrde qorǵaǵan edik,-deydi jarıs jeńimpazlarınıń biri Azat Mırzambetov.-Bunnan keyin bunday iri jarıslarǵa qatnaspaǵan menen, ózimizdiń densawlıǵımız ushın gúres zallarına barıp shınıǵıwlar isleytuǵın edim. Sonıń paydası tiydime, bilmedim, usı jıldıń 29-aprel hám 1-may kúnleri Orenburg qalasında ataqlı palwan hám trener Yuriy Semenovich CHernovtıń húrmetine ótkerilgen Rossiya ashıq kuboginde erkin gúres boyınsha 130 kg salmaq kategoriyasında 3-orındı iyelewge eristim. Rossiyadaǵı jarısta Dáwletbay Minajatdinov hám Keńesbay Sarievler finalǵa shekem jetip barıp, gúmis medal menen sıylıqlanǵan bolsa, Qádirbay Esbergenov qola medalın jeńip aldı.
Házirgi waqıtları Bozataw rayonı ekonomika hám qarjı bólimi baslıǵınıń orınbasarı bolıp islep atırǵan Azat Mırzambetov jumıstan bos waqıtları erkin gúres penen shuǵıllanıwdı dawam etip, usı oktyabr ayında Vengriyada ótkeriletuǵın jáhán chempionatına qızǵın tayarlıqlar kórmekte.

Adilbay Orazov, Qaraqalpaqstan xabar agentligi sholıwshısı.