Berdaq atındaǵı Qaraqalpaq mámleketlik universitetine Qazaqstan Respublikası Shahmardan Esenov atındaǵı Kaspiy texnologiyalar hám injenerlik universiteti prezidenti B.Axmetov basshılıǵındaǵı delegaciya keldi, – dep maǵlıwmat beredi QMU Baspasóz xızmeti bólimi.

Miymanlar milliy dástúrlerge sáykes túrde, nan-duz benen, milliy nama-qosıqlar jańlawı astında saltanatlı kútip alındı. Sapar etiw baǵdarlaması sheńberinde delegaciya universitet rektorı, akademik A.Reymov penen ushırasıp, eki tárepleme baylanıslardı bekkemlew, ilim hám bilimlendiriw tarawındaǵı birge islesiwdi jáne de tereńlestiriw máselelerin dodaladı.
Ushırasıwda birgeliktegi bilimlendiriw baǵdarlamaların engiziw, professor-oqıtıwshılardıń mamanlıǵın arttırıwda tájiriybe almasıw, studentler almasıw baǵdarlamaların shólkemlestiriw sıyaqlı áhmiyetli temalarǵa ayrıqsha itibar qaratıldı. Sonday-aq, oqıw-metodikalıq resurslardan, ilimiy laboratoriyalardan birgelikte paydalanıw, xalıqaralıq ilimiy bazalarda maqalalar basıp shıǵarıw, ilimiy konferenciyalar hám seminarlardı birgelikte shólkemlestiriw imkaniyatları da keńnen dodalandı.
Eki universitet arasında birge islesiwdi bekkemlew hám belgilengen baǵdarlarda ámeliy jumıslardı baslaw maqsetinde rásmiy birge islesiw shártnamasına qol qoyıldı. Bul kelisim eki joqarı oqıw ornınıń bilimlendiriw hám ilimiy-izertlew tarawlarındaǵı baylanısların jańa basqıshqa alıp shıǵıwda úlken áhmiyetke iye.
Bul sapar etiw eki joqarı bilimlendiriw mákemesi arasındaǵı uzaq múddetli, turaqlı hám nátiyjeli birge islesiwdi rawajlandırıw ushın bekkem tiykar bolıp xızmet etedi.

Qaraqalpaqstan xabar agentligi