Yaponiyanıń Serendix atlı startapı qurılıs tarawında revolyuciyalıq qatnastı kórsetip, eki kúnde tayar bolatuǵın zamanagóy turaq jaylardı usınıs etpekte. Bul futuristlik turaq jaylar úlken 3D-printerler járdeminde qurıladı hám qısqa waqıt ishinde paydalanıwǵa tapsırıladı.

Kompaniyanıń maǵlıwmatlarına bola, 49 kvadrat metr maydanǵa iye bunday jay tek 44,5 saatta qurıp pitkeriledi. Bul múddetke jer tayarlaw hám kommunikaciyalardı jalǵaw jumısları kirmeydi. Yaǵnıy, tiykarǵı konstrukciya, diywallar hám strukturanıń qáliplesiwi 3D-printer arqalı avtomatlastırılǵan túrde ámelge asırıladı.
Úydiń bahası 37 mıń AQSh dollarına teń, bul bolsa Yaponiya bazarında eki bólmeli kvartira yamasa zamanagóy sırt el avtomobiliniń bahasına teń. Bunday turaq jaylar tek ǵana arzan hám tez qurılatuǵın emes, al ekologiyalıq hám energiyanı únemleytuǵın variant sıpatında da itibardı tartpaqta.
Serendix kompaniyası bul texnologiya járdeminde turaq jay mashqalasına nátiyjeli sheshim usınıs etiw, sonday-aq, tábiyǵıy apatshılıqlar yamasa ayrıqsha jaǵdaylarda operativ turaq jaylardı támiyinlew imkaniyatların da názerde tutpaqta.

Madinabonu Nasrieva, Uluǵbek Twxtaev, ÓzAnıń xabarshıları