Stokgolm qalasında Oraylıq Aziya xalıqaralıq institutı (OAXI) direktorı Javlon Vahobov Norvegiya xalıqaralıq qatnasıqlar institutı (NUPI) Klimat hám energetika boyınsha izertlew toparınıń basshısı doktor Roman Vakulchuk penen ushırasıw ótkerdi.

Sóylesiw waqtında tárepler Oraylıq Aziyada turaqlı rawajlanıw, energetikalıq ótiw hám klimat siyasatı baǵdarlarında ilimiy, ekspertlik birge islesiwin bekkemlew perspektivasın dodaladı.
Doktor Vakulchuk atap ótkenindey, xrom, marganec, qorǵasın, cink sıyaqlı áhmiyetli elementlerge bay biziń regionımız quyash paneli, samal turbinası hám akkumulyator islep shıǵarıw ushın tiykarǵı resurs mákanı bolıp esaplanadı. Usı kózqarastan Oraylıq Aziya global energetikalıq ótiw sharayatında usı strategiyalıq shiyki zat shınjırında áhmiyetli buwınǵa aylanıw potencialına iye.
Óz gezeginde J.Vahobov jasıl ekonomikanı rawajlandırıw hám uglerod iyisin azaytıwǵa qaratılǵan infrastrukturalıq joybarlarǵa investiciya tartıw áhmiyetli ekenligin atap ótti.
Ushırasıw juwmaǵında tárepler OAXI hám NUPI arasında birgeliktegi izertlew alıp barıw, ekspert seminarların shólkemlestiriw, tallawlı materiallar almasıw arqalı birge islesiwdi tereńlestiriwden mápdar ekenligin bildirdi. Bunday qatnasıqlar Oraylıq Aziyada turaqlı rawajlanıw boyınsha nátiyjeli strategiya islep shıǵıwǵa xızmet etetuǵını atap ótildi.
Norvegiya xalıqaralıq qatnasıqlar institutı siyasat, qáwipsizlik, energetika hám klimat máselelerine qánigelesken jetekshi izertlew orayı bolıp esaplanadı. Bul mákeme turaqlı rawajlanıw, xalıqaralıq birge islesiw procesine tásir kórsetetuǵın global hám regionallıq joybarlar, baslamalardı tereń tallaydı.

Ǵ.Xonnazarov, ÓzA