Ózbekstan Respublikası Prezidentiniń 2024-jıl 20-dekabr kúngi «Kurash milliy sport túrin rawajlandırıw hám ǵalaba en jaydırıwdı jańa basqıshqa alıp shıǵıw ilajları haqqında»ǵı PQ-450-sanlı qararına hám Ózbekstan Respublikası Sport ministrligi hám kurash federaciyasınıń 2025-jılǵı kalendar rejesi tiykarında, Surxandarya wálayatınıń Termiz qalasında milliy gúres boyınsha nuraniy sportshılar arasında Ózbekstan chempionatı bolıp ótti.

CHempionatta 36-45, 46-55, 56 hám onnan joqarı jastaǵı nuraniy sportshılar arasında bellesip, onda respublikamız palwanları da jaqsı nátiyjelerdi qolǵa kirgiziwge miyasar boldı.
Atap aytqanda, 36-45 jas aralıǵında 70 kg salmaqta Nókisbay
– Daniyarov úshinshi orındı iyelegen bolsa, 46-55 jastaǵı palwanlar arasında 70 kg salmaqta Azamat Nurımov bas sıylıqtı jeńip aldı. Al, 80 hám 90 kg salmaqta Axmet Babaniyazov penen Ravshanbek Xalikovlar qola medalı menen sıylıqlandı.
56 hám onnan joqarı jastaǵı sportshılar arasında ótkerilgen bellesiwde 90 kg salmaqta Farhad Aymanovta úshinshi orındı iyelewge miyasar boldı.

-Ózbekstan chempionatında jeńimpaz bolǵan hám sıylı orınlardı iyelegen nuraniy sportshılar Jáhán chempionatına qatnasıw huqıqına iye boldı,-deydi jarıs jeńimpazı Azamat Nurımov.-Aldaǵı waqıtları shınıǵıwlardı jáne de kúsheytip jáhán chempionı bolıwǵa háreket etemen.

Adilbay Orazov,
Qaraqalpaqstan xabar agentligi