Samarqand qalasında ekinshi Ózbekstan – Qıtay aymaqlararaldıq forumı bolıp ótti.

Onda eki tárep hukimet aǵzaları, ministrler, aymaqlar basshıları hám isbilermenleri qatnastı.
Forumnıń ashılıw máresiminde Ózbekstan Respublikası Bas ministriniń orınbasarı Jamshid Xwjaev, Qıtay Xalıq Siyasiy másláhát Keńesiniń 14-shaqırıq májilisi baslıǵınıń orınbasarı, ShBShnıń qońsıshılıq, doslıq hám birge islesiw boyınsha Qıtay komiteti baslıǵı Shen Yueyue xanım shıǵıp sóylep, Ózbekstan hám Qıtay mámleket basshılarınıń belsendi hám pragmatikalıq sırtqı siyasatları, xalıqlarımız arasındaǵı jaqsı qońsıshılıq hám ázeliy doslıq qatnasıqları sebepli mámleketlerimiz arasındaǵı sawda-ekonomikalıq, mádeniy-gumanitarlıq birge islesiw jıl sayın rawajlanıp baratırǵanın atap ótti.
– Ótken jıl yanvar ayında Qıtay Xalıq Respublikasına ámelge asırılǵan joqarı dárejedegi sapar mámleketlerimiz arasındaǵı strategiyalıq sheriklik qatnasıqlardıń jańa dáwirin baslap berdi, – dedi Ózbekstan Respublikası Bas ministriniń orınbasarı Jamshid Xwjaev. – Usı sapar dawamında Urumchi qalasında birinshi Ózbekstan- Qıtay aymaqlararalıq forumı ótkerilip, onda sociallıq-ekonomikalıq birge islesiw qatnasıqlardı keńeytiw boyınsha kelisimlerge erisilgen edi. Búgin Samarqandta ótkerilip atırǵan ekinshi forumda Qıtaydan mıńǵa shamalas iri kompaniyalardıń wákilleri hám isbilermenler, óz gezeginde elimizden 1400 den aslam isbilermenler, firma hám kompaniyalardıń basshıları qatnasıp atırǵanı aymaqlararalıq birge islesiw jedel rawajlanıp atırǵanınan dárek beredi. Bunı sanlar da kórsetip tur. Atap aytqanda, keyingi bes jılda Ózbekstan hám Qıtay arasında sawda aylanısı eki esege artıp, 2024-jılı 13 milliard dollarǵa jetti. 2017-jılǵa salıstırǵanda Qıtaydan Ózbekstanǵa tartılıp atırǵan tikkeley investiciyalar bes esege, qospa kárxanalardıń sanı úsh esege arttı. Ximiya, mashina qurılısı, qurılıs materialları, turmıslıq texnika, awıl xojalıǵı ónimlerin islep shıǵarıw boyınsha birgeliktegi joybarlar tabıslı ámelge asırılıp kelinbekte. Qıtay kompaniyaları ushın ayrıqsha imkaniyat jaratıw maqsetinde aymaqlarımızda 8 Ózbekstan – Qıtay sanaat parki jumıs alıp barmaqta. Házirgi waqıtta bunday parklerdi jáne de kóbeytiw ústinde jumıs alıp barılmaqta.
Qıtaydıń 10 nan aslam regionınıń basshıları Ózbekstanǵa kelgeni hám Ózbekstannan barlıq wálayatlardıń hákimleri Qıtayda bolıp, óz-ara birge islesiw baylanısların rawajlandırıw baǵdarında jedel háreket alıp barıp atırǵanı, 20 dan aslam qala hám regionlardıń óz-ara doslasqanın birge islesiwdiń joqarı dinamikası sıpatında tán aldı.
Forumda Qıtay Milliy sırt mámleketler menen doslıq awqamınıń vice-prezidenti Czyan Czyan, “Qıtay – Oraylıq Aziya” birge islesiw sekretariatınıń bas xatkeri Sun Veydong jıl sayın rawajlanıp atırǵan Ózbekstan – Qıtay qatnasıqları tek ǵana mámleketlerimiz emes, al Oraylıq Aziya ushın da úlken áhmiyetke iye ekenin atap ótti. Sonday-aq, usı jıl 1-iyunnen Ózbekstan hám Qıtay puqaraları ushın vizasız rejim engiziliwi de óz-ara birge islesiw baylanısların bunnan bılay da rawajlandırıwǵa úlken túrtki beretuǵını atap ótildi.
Eki tárep aymaqlarınıń basshıları bolsa bar resurslar jáne ekonomikalıq, investiciyalıq imkaniyatlar haqqında maǵlıwmat berip, isbilermenlerdi birge islesiwge shaqırdı.
Bunnan soń tárepler arasında hújjetler almasıldı. Sonıń ishinde, Ózbekstan Joqarı bilimlendiriw, ilim hám innovaciyalar ministrligi, Energetika ministrligi hám Sian neft universiteti arasında Ózbekstanda Sian neft universitetiniń filialın shólkemlestiriw haqqında kelisimge, Ózbekstan Respublikası Mektepke shekemgi hám mektep bilimlendiriwi ministrligi hám Sian xalıqaralıq izertlewler universiteti arasında bilimlendiriw tarawındaǵı ańlasıw memorandumına qol qoyılǵanı atap ótildi.
Forum qatnasıwshıları Ózbekstan hám Qıtay milliy ónimleri kórgizbesiniń ashılıwında qatnastı.
Ánjuman sheńberinde sawda-ekonomikalıq birge islesiw, innovaciyalar, texnologiyalar hám jasıl ekonomika boyınsha biznes-forum, injenerlik tarawında bilimlendiriw hám kadrlar tayarlaw, Ózbekstan hám Qıtaydıń tariyxıy paytaxtların saqlaw hám rawajlandırıwǵa járdemlesiw, sonday-aq, qıtay tilin xalıqaralıq kólemde joqarı sapalı oqıtıw máselelerine baǵıshlanǵan sessiyalar ótkerildi.
“Ullı jipek jolı – Ózbekstan hám Qıtay innovaciya hám isbilermenlik boyınsha birge islesiw” xalıqaralıq hayal-qızlar forumında Ózbekstan hám Qıtay regionları arasında investiciyalardı tartıw, isbilermenlik, sawda-ekonomikalıq hám ilimiy-texnikalıq birge islesiwdi kúsheytiwde hayal-qızlardıń qatnasıwın keńeytiw, hayal-qızlardıń innovaciyalıq baslamaları hám isbilermenligin qollap-quwatlaw jáne rawajlandırıw máseleleri dodalandı. Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova hám Qıtay Xalıq Siyasiy másláhát keńesiniń 14-shaqırıq májilisi baslıǵınıń orınbasarı, ShBShnıń qońsıshılıq, doslıq hám birge islesiw boyınsha Qıtay komitetiniń baslıǵı Shen Yueyue xanım bul baǵdarda isbilermen hayal-qızlar hár tárepleme qollap-quwatlanatuǵının málim etti.
Forum dawamında “V2V”, “G2V” hám “G2G” ushırasıwlar, joybarlar prezentaciyaları hám mádeniy baǵdarlamalar da shólkemlestirildi.

Ǵolib Hasanov, Alisher Isroilov (súwret), ÓzA xabarshıları