Nókis qalasında «Bes baslama olimpiadası» sheńberinde sporttıń voleybol túrinen qızlar arasında 16-21 hám 22-30 jastaǵılar arasında Qaraqalpaqstan Respublikası basqıshı bolıp ótti.

Qızǵın bellesiwlerge bay bolǵan jarıs juwmaǵında, 16-21-jastaǵılar arasında birinshi orındı Beruniy rayonındaǵı Shabbaz awıl puqaralar jıyını komandası jeńip alıwǵa miyasar boldı.
Al, sıylı ekinshi hám úshinshi orınlar Qaraózek rayonındaǵı A. Dosnazarov hám Qońırat rayonındaǵı Sanaat mákan puqaralar jıyınları jasları iyelewge eristi.
22-30 jastaǵılar arasında bolsa, Moynaq rayonı Jayhun mákan puqaralar jıyını jaslarına teń keletuǵın qarsılas tabılmadı hám olar jarıstıń bas sıylıǵı menen sıylıqlandı.
Ekinshi hám úshinshi orınlardı bolsa, Shomanay rayonındaǵı Mamıy hám Xojeli rayonındaǵı Júzimzar elatlarınıń komandalarına nesip etti.
Jarıs juwmaǵında jeńimpazlar shólkemlestiriwshiler tárepinen tayarlanǵan diplom hám estelik sawǵalar menen sıylıqlanıp, birinshi orın iyeleri jarıstıń Ózbekstan Respublikası basqıshına jollamanı qolǵa kirgizdi.

Adilbay Orazov,
Qaraqalpaqstan xabar agentligi sholıwshısı.