Házirgi waqıtta Oliy Majlis Nızamshılıq palatasınıń gezektegi májilisi bolıp ótpekte. Májilis aldında Oliy Majlis Nızamshılıq palatasınıń Spikeri N.Ismoilov ótken háptede mámleketimizdiń sırtqı siyasiy turmısındaǵı áhmiyetli waqıyalarǵa toqtap ótti.

– Italiya Respublikası ekonomikalıq hám texnologiyalıq potencialǵa iye mámleket sıpatında Ózbekstannıń Evropa Awqamındaǵı áhmiyetli sheriklerinen biri bolıp esaplanadı. Keyingi jıllarda eki mámleket jetekshileriniń siyasiy erk-ıqrarı hám ámeliy háreketleri nátiyjesinde Ózbekstan hám Italiya arasındaǵı birge islesiw izbe-iz keńeyip barmaqta. Joqarı dárejedegi turaqlı sóylesiwler óz-ara isenim hám turaqlı birge islesiw ortalıǵın jaratpaqta.
Bizge belgili, usı jılı 28-29-may kúnleri mámleketimiz basshısınıń mirát etiwine bola, Italiya Respublikası Bas ministri Jorja Meloni rásmiy sapar menen elimizde boldı. Bul sapar etiw eki mámleket arasındaǵı óz-ara isenim hám mápdarlıqqa tiykarlanǵan baylanıslardı bunnan bılay da bekkemlewge xızmet etti, desek durıs boladı.
Joqarı dárejedegi sóylesiwlerde Ózbekstan – Italiya qatnasıqlarınıń barlıq baǵdarları tolıq dodalandı, óz-ara birge islesiwdiń jańa perspektivaları belgilep alındı. Eki mámleket arasında Strategiyalıq sheriklik qatnasıqların bekkemlew haqqındaǵı birgeliktegi deklaraciya qabıl etildi.
Siyasiy sóylesiw, sawda-ekonomikalıq, investiciyalıq hám mádeniy-gumanitarlıq tarawlardaǵı baylanıslardı keńeytiw jáne jańa imkaniyatlar jaratıwǵa qaratılǵan bir qatar áhmiyetli hújjetlerge qol qoyıldı.
Bir sóz benen aytqanda, Samarqand qalasında doslıq ruwxında bolıp ótken sóylesiwler dawamında erisilgen hár bir kelisim uzaq múddetli hám turaqlı baylanıslardı támiyinlewge xızmet etetuǵınına gúman joq.
Sonday-aq, 30-may kúni Qazaqstannıń Astana qalasında “Oraylıq Aziya – Italiya” formatındaǵı sammit bolıp ótti. Onda mámleketimiz Prezidenti qatnasıp, shıǵıp sóyledi. Onda Ózbekstan sırtqı siyasatı ashıq-aydınlıq hám konstruktivlik sóylesiw arqalı mámleketimiz hám regionımız máplerin támiyinlewge qaratılǵanın kórsetti, desek durıs boladı.
Mámleketimiz basshısınıń shıǵıp sóylegen sózinde búgingi global hám regionallıq baylanıslardaǵı tendenciyalardan kelip shıǵıp, kóp tárepleme qatnasıqlardı rawajlandırıwdıń tiykarǵı baǵdarlarına ayrıqsha itibar qaratıldı. “Oraylıq Aziya – Italiya” isbilermenler klubın shólkemlestiriw, Sanaat hám texnologiyalıq birge islesiw baǵdarlamasın qabıl etiw, Italiyanıń jetekshi brendleriniń qatnasıwında dizayn orayların shólkemlestiriw, “Oraylıq Aziya – Italiya” ilimiy-bilimlendiriw konsorciumın shólkemlestiriw sıyaqlı áhmiyetli usınıs hám baslamalar alǵa qoyılmaqta.
Prezidentimiz baslamalarınıń mazmun-mánisin hám áhmiyetin orınlarda úgit-násiyatlaw jáne nızamshılıq tarawında qollap-quwatlaw boyınsha siyasiy partiyalar frakciyaları, komitetler hám komissiyalar óz jumısların jedellestiriwi kerek, – dedi Spiker.

Muhtarama Komilova,
ÓzA