Jaslardı fizikalıq jaqtan shınıqtırıw, olardıń sport tarawındaǵı qábiletlerin júzege shıǵarıwı ushın zárúr sharayatlardı jaratıwǵa baǵdarlaǵan ilajlar respublikamızdıń basqa aymaqlarında bolǵanı sıyaqlı, Qaraózek rayonında da ámelge asırılmaqta.

Futbol boyınsha Ózbekstan Respublikası «Mámleketlik qáwipsizlik xızmeti» kubogi ushın shólkemlestirilgen jarıslar usınday ilajlardan biri bolıp esaplanadı.
Jarıstıń sıylıqlaw keshesinde rayon hákimi A. Baymuratov shıǵıp sóylep, bul ilajlar aymaqlardaǵı jaslardıń salamatlıǵın bekkemlew hám olardı ǵalaba túrde sportqa qamtıw maqsetinde ótkerilip atırǵanlıǵın atap ótti.
Keshede jeńimpaz komandalar hám arnawlı nominaciyalarda eń kúshli dep tabılǵan oyınshılar shólkemlestiriwshiler tárepinen tayarlanǵan diplom, medal, kubok hám estelik sawǵalar menen sıylıqlandı.
Ilajda respublikamızǵa belgili estrada qosıqshıları tárepinen qatnasıwshılarǵa koncert baǵdarlaması qoyıp berildi.
Sıylıqlaw máresimine Qaraqalpaqstan Respublikası Joqarǵı Keńesiniń komitet baslıǵı Sh. Otemisov qatnastı.

Adilbay Orazov,
Qaraqalpaqstan xabar agentligi sholıwshısı.