Beruniy rayonında energiya nátiyjeliligin arttırıw hám ekologiyalıq qáwipsizlikti támiyinlewge qaratılǵan ilajlar izbe-iz ámelge asırılmaqta.

Ózbekstan Respublikası Prezidentiniń 2025-jıl 1-apreldegi PQ-133-sanlı qararınıń orınlanıwı sheńberinde Bas prokuratura basqarma baslıǵınıń orınbasarı S.Achilov hám Beruniy rayonı prokurorı M.Atadjanov basshılıǵındaǵı jumısshı topar aǵzaları rayondaǵı bir qatar obektlerde úyreniw jumısların alıp bardı, – dep maǵlıwmat beredi rayon hákimligi Málimleme xızmeti bóliminiń baslıǵı A.Urazova.
Atap aytqanda, “Beruniy Agro Qurilish” JShJ tárepinen qurılıp atırǵan kóp qabatlı turaq jaylarda zamanagóy hám energiyanı únemleytuǵın “Eko ısıtıw qazanları” ornatılmaqta. Bul ısıtıw sisteması imarat ishindegi elektr energiyası menen tolıq isleydi, bul bolsa tábiyǵıy gazden paydalanıwdı azaytıw arqalı áhmiyetli ekonomikalıq nátiyjege erisiw imkaniyatın beredi.
Sonday-aq, jumısshı topar aǵzaları “Usta Bazarbay” JShJ tárepinen Toqimachi máhállesinde ornatılıp atırǵan 300 kVt quwatlılıqqa iye quyash panelleri joybarı menen tanıstı. Sapar dawamında fermer xojalıqlarınıń jer maydanlarında jaylastırılǵan quyash energiyası úskeneleri – sonıń ishinde, “Niyatullo Azizbek” fermer xojalıǵı aymaǵındaǵı 20 kVt quwatlılıqqa iye paneldiń jumıs islewi hám onnan paydalanıw processleri jáne únemliligi úyrenildi.
Bul sapar etiwler sheńberinde ámelge asırılıp atırǵan joybarlar energiyanı únemlew, ekologiyalıq tazalıqqa erisiw hám xalıqtıń qolaylı turmıs tárizin támiyinlew jolındaǵı áhmiyetli qádemlerden biri sıpatında atap ótildi.

Qaraqalpaqstan xabar agentligi