Ózbekstan Respublikası Ekologiya, qorshaǵan ortalıqtı qorǵaw hám klimat ózgeriwi ministrligi, Turizm komiteti, Joqarı bilimlendiriw, ilim hám innovaciyalar ministrligi, Qaraqalpaqstan Respublikası Ministrler Keńesi, «Ózbekstan temir jolları» AJ hám basqa da tiyisli shólkemler menen birgelikte shólkemlestirilgen «Aral teńizine poezd» jaslar ekologiyalıq akciyası qatnasıwshıları Aralboyı xalıqaralıq innovaciya orayına bardı.

Ózbekstannıń barlıq aymaqlarınan tańlap alınǵan 600 den aslam belsendi, intaker jaslarǵa Aralboyı regionında ámelge asırılıp atırǵan innovaciyalıq qollanbalar hám ekologiyalıq baslamalar tanıstırıldı.
Toǵaylardı tiklew joybarlarına, sonıń ishinde, Aral teńiziniń qurıǵan ultanında shorǵa shıdamlı terek hám putalar egiw boyınsha eń iri joybarǵa ayrıqsha itibar qaratıldı. Sonday-aq, studentler tábiyattan turaqlı paydalanıw, qorshaǵan ortalıqtıń sanlı monitoringi, «jasıl» texnologiyalardı engiziw hám ekologiyalıq turizmdi rawajlandırıw boyınsha zamanagóy kózqaraslar menen tanıstı.

ÓzA