Kekselerdi húrmetlew, olarǵa bárqulla itibarlı, mehirli bolıw bul ata-babalarımızdan kiyatırǵan qádiriyatlarımızdan esaplanadı. Olardıń turmıs tájiriybelerinde sınalǵan biybaha úgitleri shańaraqlardıń tınısh-tatıw, abadan jasawında, perzentler tárbiyasında qanshelli zárúr ekenin hámmemiz jaqsı bilemiz.

ÓzLiDeP Qaraqalpaqstan Respublikası Keńesiniń belsendileri hám deputatları tárepinen de húrmetli ata-analarımız, miynet nuraniylarınıń turmısın mazmunlı hám payızlı etiw, olar ushın múnásip turmıs sharayatın jaratıw, densawlıǵın bekkemlew boyınsha bir qatar sawaplı jumıslar ámelge asırılmaqta.
Ásirese, kekse hám sociallıq qorǵawǵa mútáj insanlardı qollap-quwatlaw, olardıń waqtın mazmunlı shólkemlestiriw hám ishki turizmdi rawajlandırıw maqsetinde partiya belsendileri tárepinen kekse áwlad wákilleriniń elimizdegi tariyxıy orınlarǵa biypul sayaxatı shólkemlestirilmekte.
– Húrmetli nuraniylarımızdı házirgi dáwir jaslarına súyenish, ustaz, elimizdiń ullı keleshegine tilekles dep biliwimiz kerek. Olardıń aq pátiyaları jaslarmızdıń keleshegi ushın álbette zárúr. Bul túsinikti jámiyetke engiziwdi bárinen burın, muqaddes dinimiz, qalaberdi, dáwirimizdiń talabı hám usınısı dep biliwimiz kerek, – deydi Qaraqalpaqstan Respublikası Joqarǵı Keńesiniń deputatı Bahodirjon Sidikov.
Iygilikli baslama sheńberinde Qońırat rayonındaǵı “Qaratal,” “Qumbız,” “Berdaq,” “Monshaqlı,” “Qashı,” “Altınkól” APJ, sonday-aq, “Qańlı,” “Ájiniyaz” hám “Qıpshaq” MPJ nuraniyları ushın usı jıldıń 27-31-may kúnleri Buxara, Samarqand hám Qazaqstan Respublikasınıń Túrkstan qalalarına sayaxat shólkemlestirildi. Sayaxat dawamında miyneti menen kópshilikke úlgi bolǵan nuraniylarımız tek ǵana elimizdegi emes, al qońsı mámlekettiń, atap aytqanda, eski qalalardaǵı ózgerisler, dóretiwshilik jumısları menen tanıstı, tariyxıy esteliklerdi zıyarat etti.
– Deputatımızdıń baslaması menen usı kúnge shekem 200 den aslam nuraniy Buxara, Xiywa, Samarqand hám Túrkstan qalalarına sayaxatqa barıp qayttı, – deydi ÓzLiDeP Qaraqalpaqstan Respublikası Keńesiniń apparat baslıǵı Adip Aybergenov. – Házirgi waqıtta Qońırat rayonı nuraniylarınıń Qazaqstan Respublikası Túrkstan qalasındaǵı xalıqaralıq turistlik orayǵa sayaxatı shólkemlestirilmekte. Hár jılı 50 nuraniy jańa turistlik oray hám qaladaǵı basqa da muqaddes orınlardı zıyarat etip kelmekte. Bunnan tısqarı, ishki turizmdi rawajlandırıw maqsetinde elimizdiń Buxara, Samarqand qalalarındaǵı zıyarat orınlarına da sayaxatlar shólkemlestirildi.
Nuraniylar sayaxat dawamında úlken ózgerislerdiń gúwası boldı. Kekselerdiń respublika boylap sayaxatı ushın zamanagóy hám qolaylı avtobuslar biriktirildi. Olardıń azıq-awqat, jataqxana, muzey hám basqa da orınlarǵa barıw qárejetleri de deputat tárepinen tólenbekte.
– Aldın biz de qashan sayaxatlarǵa baramız, watanımızdıń belgili orınların kóremiz, dep árman etip jasaytuǵın edik. Bala-shaǵa deymiz. Toy-merekemiz kóp. Bereket tapsın deputatımız, onıń baslaması menen rayonımızda hár jılı sayaxat etetuǵınlar bar. Biz de sayaxatta bolıp, Samarqand, Buxara, Túrkstanlardı kórip keldik. Mıń márte esitkennen bir márte kórgen abzal, dep biykarǵa aytılmaǵanına gúwa boldıq, – deydi Qońırat rayonı “Qumbız” máhállesinde jasaytuǵın nuraniy Lola Bozglanova.
Barlıq nárse “Insan qádiri ushın” principi tiykarında alıp barılıp atırǵan jumıslar qatarında jası úlken nuraniylarımız ushın shólkemlestirilgen bul sayaxat olardıń elimizdegi qádir-qımbatınıń bálent ekenliginiń jáne bir kórinisi boldı. Usı mániste, kekseler qádirlengen shańaraq hám ǵárezsiz elde bárqulla miyrim-shápáát, qut-bereket hám tınıshlıq boladı. Partiyamızdıń nuraniylardı qollap-quwatlaw maqsetinde ámelge asırıp atırǵan baslamaları da áne, usı iygilikli maqsetti gózleydi.

Qaraqalpaqstan xabar agentligi