1-iyun – Xalıqaralıq balalardı qorǵaw kúni múnásibeti menen Ózbekstan “Adolat” social-demokratiyalıq partiyası Qaraqalpaqstan Respublikası Keńesi tárepinen Respublikalıq qan quyıw orayında “Bar mehirimiz saǵan, balajan!” súreni astında 2-iyunnan 13-iyunǵa shekem ótkeriletuǵın biyǵárez donorlıq akciyası baslandı.

Akciyanıń tiykarǵı maqseti – awır keselliklerge shatılǵan hám qanǵa mútáj balalardı qollap-quwatlaw, olar ushın jeterli muǵdarda qan rezervin jaratıw bolıp tabıladı.
Akciyada hár qıylı taraw wákilleri, partiya belsendileri, medicina xızmetkerleri hám belsendi puqaralar qatnaspaqta. Qan tapsırıw procesi sanitariyalıq-gigienalıq talaplarǵa tolıq ámel etken halda shólkemlestirilgen.
Bul ilaj tek ǵana balalarǵa járdem beriw emes, al jámiyette sociallıq juwapkershilik hám adamgershilik sezimlerin bekkemlewge de xızmet etedi.
Qan tapsırıwǵa kelgenler arasında birinshi márte donor bolıp atırǵan jaslar da, bul qayırlı isti dástúrge aylandırǵan tájiriybeli donorlar da bar.
– Qan tapsırıw – bul tek ǵana medicinalıq process emes, al insan ómirin saqlap qalıw imkaniyatı. Hár jılı usınday ilajlarǵa qatnasıwdı ózime minnetli dep bilemen. Balalar ushın islegen hár bir iygilikli isimiz, álbette, qaytatuǵınına isenemen,-deydi partiyanıń Qaraqalpaqstan Respublikalıq Keńesi baslıǵınıń orınbasarı R.Otarbaev.
Akciya qatnasıwshıları arnawlı shıpakerler tárepinen qan tapsırıwdan aldın hám keyin medicinalıq tekseriwden ótkerildi. Olarǵa qan beriw procesi hám onıń salamatlıq ushın paydalı tárepleri haqqında maǵlıwmatlar berildi.
Ótkerilip atırǵan bul biyǵárez donorlıq akciyası keń jámiyetshilik tárepinen qızǵın qollap-quwatlanbaqta. Ilajda ıqtıyarlı túrde kelgen puqaralar menen birge Ayrıqsha jaǵdaylar ministrligi xızmetkerleri de qatnaspaqta.
1-iyun – Xalıqaralıq balalardı qorǵaw kúni múnásibeti menen ótkerilip atırǵan bul ilaj respublikamız boylap dawam etpekte.

Á.Jiyemuratov,
Qaraqalpaqstan xabar agentligi