Qaraqalpaqstan Respublikası Awıl xojalıǵı ministrliginiń maǵlıwmatlarına qaraǵanda respublikamızda 2025-jıldıń zúrááti ushın awıl xojalıǵı texnikaları tolıq ońlanıp, máwsimge tayar halǵa keltirildi.

Atap aytqanda, 157 ǵálle orıw kombaynı 100 procent ońlanıp, máwsimge tayar etildi. Basqa texnikalardan 510 júk avtomobili, 1422 traktor tirkemesi, 158 kóshpeli ustaxana, 108 janılǵı tasıw transportı máwsimge tayarlandı.
Orınlarda awıl xojalıǵı texnikalarınıń máwsimge tayarlıǵı kózden ótkerilip, tiyisli wazıypalar belgilenbekte.
Kegeyli rayonında joqarı ónimli ǵálle orıw kombaynlarınıń ǵálle orım-jıyın jumıslarına tayarlıǵı úyrenilip, onda Agroinspekciyanıń Qaraqalpaqstan Respublikası basqarmasınıń bólim baslıǵı A.Aytjanov, rayondaǵı juwapker basshılar hám qánigeler, otryadlarǵa biriktirilgen xızmetkerler, sonday-aq, 6 ǵálle orıw kombaynlarınıń operatorları qatnastı.
Maǵlıwmat ushın, bul rayonda 2025-jıldıń ónimi ushın 3970 gektar maydanǵa ǵálle egilgen. Usı maydanlarda jetistirilgen ǵálleni orıp-jıynaw maqsetinde 6 otryad shólkemlestirilip, bul otryadlardıń quramına rayondaǵı juwapker shólkemlerdiń xızmetkerleri tartıldı. Otryadlarǵa 6 ǵálle orıw kombaynları, zárúr ǵálle tasıw mashinaları biriktirildi.
Ǵálle orıw kombaynı operatorlarına máwsimdi shólkemleskenlik hám zıyansız ótkeriw boyınsha tapsırmalar berilip, hár bir operatorǵa azıq-awqat ónimleri tarqatıldı.
Shomanay rayonında da jetistirilgen biyday zúráátin tolıq hám sapalı jıynap alıw maqsetinde kombaynlardıń texnikalıq jaǵdayın kózden ótkeriwge qaratılǵan kórgizbeli seminar shólkemlestirildi.
Seminarǵa rayon hákimi A.Ametov, Respublikadan biriktirilgen jumısshı topar aǵzaları, rayonlıq awıl xojalıǵı tarawınıń wákilleri hám mexanizatorlar qatnastı.
Seminar dawamında taraw qánigeleri tárepinen ǵálle zúráátin qısqa múddetlerde jıynap alıw boyınsha usınıslar berildi. Kombaynlardıń texnikalıq jaǵdayı, olardıń islew mexanizmleri hám qáwipsizlik qaǵıydalarına ayrıqsha dıqqat qaratıldı.
Ǵálle orım-jıyınında qatnasatuǵın barlıq kombaynlardıń texnikalıq jaǵdayı tolıq tekseriliwi hám zárúr ońlaw jumısları óz waqtında ámelge asırılıwı rejelestirilgen.
Bul ilajlar rayonlarda jetistirilgen biyday zúráátin shıǵınsız hám qısqa múddetlerde jıynap alıwdı támiyinlewge xızmet etedi.

Á.Jiyemuratov,
Qaraqalpaqstan xabar agentligi