Kúni keshe elimizde 1-iyun Xalıqaralıq balalardı qorǵaw kúni keń túrde bayramlanıp, orınlarda balalar ushın hár qıylı bayram ilajları shólkemlestirildi.

ÓzLiDeP Qaraqalpaqstan Respublikası Keńesi tárepinen de 1-iyun – Xalıqaralıq balalardı qorǵaw kúni múnásibeti menen “Salamat bala – watan keleshegi” súreni astında salamatlıq ilajları bolıp ótti.

Bozataw rayonı sport mektebinde shólkemlestirilgen balalar salamatlıǵına baǵıshlanǵan ilajda 2010-2016-jıllarda tuwılǵan 40 tan aslam sportshı balalar sporttıń “Badminton” túri boyınsha óz-ara kúsh sınasıp, jeńimpazlıq ushın qızǵın bellesiwler alıp bardı. Onda ÓzLiDeP Bozataw rayonlıq Keńesi apparat baslıǵı Begdiyar Qutlımuratov qatnasıp, jas sportshılardı bayram menen qutlıqlap, turaqlı denetárbiya hám sport penen shuǵıllanıwdıń salamatlıqqa paydası hám áhmiyeti haqqında aytıp ótti.
– Hámmemizge belgili, kompyuter texnologiyaları ásirinde, tilekke qarsı, balalar arasında ashıq maydanlarda fizikalıq háreketti talap etetuǵın oyınlardı oynaw azayıp ketti. Nátiyjede, bul olardıń fizikalıq hám psixologiyalıq jaǵdayına belgili dárejede unamsız tásir kórsetpekte. Sonıń ushın da balalardı sport túri hám oyınlarǵa kóbirek waqıt ajıratıwǵa shaqırıw kerek. Jeńil shınıǵıwlar hátteki náresteler ushın da paydalı esaplanadı, – deydi ÓzLiDeP Bozataw rayonlıq Keńesi apparat baslıǵı B. Qutlımuratov.
Qızǵın bellesiwlerge bay bolǵan jarıs juwmaǵında jeńimpazlar shólkemlestiriwshiler tárepinen tayarlanǵan diplom, medal hám estelik sawǵaları menen sıylıqlandı.
Balalar ómirimizdiń dawamshıları, biziń barlıǵımız. Olardı qásterlep saqlaw, hár tárepleme bárkamal etip kamalǵa keltiriw hár bir shańaraq, hár bir ata-ananıń wazıypası bolıp esaplanadı. Balalardıń qábiletin kórsetiw hám múnásip xoshametlew maqsetinde shólkemlestirilgen tańlaw balalar ushın haqıyqıy bayramǵa aylandı.

Qaraqalpaqstan xabar agentligi