Ózbekstan Respublikası Oliy Majlisi Nızamshılıq palatasınıń deputatı Guljan Xalmuratova Shomanay rayonında bir qatar ushırasıwlar ótkerip, dáslep ol Ketenler awıl puqaralar jıyınındaǵı máhálle turǵınları menen ushırastı.

Onda rayon hákimi A.Ametov, Nızamshılıq palatasınıń deputatı Ruslan Djumamuratov, juwapker shólkemlerdiń hám ǵalaba xabar qurallarınıń wákilleri qatnastı.
Sáwbetlesiwlerde puqaralarǵa nızamshılıqtaǵı jańalıqlar, parlamentte insanıylıq principleri tiykarında puqaralardıń máplerinen kelip shıǵıp, qabıl etilip atırǵan nızamlardıń mazmun-mánisi túsindirildi. Bunnan tısqarı, máhállede huqıqbuzarlıqlardıń erte aldın alıw hám “sociallıq profilaktika” sistemasın durıs shólkemlestiriw, toy-mereke hám máresimlerde artıqsha ısırapgershilikke jol qoymaw jáne qabıl etilgen nızamlar, Nızamshılıq palatasında dodalawda turǵan nızam joybarları boyınsha úgit-násiyat jumısları alıp barıldı.
Sonıń menen birge, xalıqtıń mashqalaları da úyrenilip, usınıslar alındı. Soń xalıq wákili rayondaǵı sociallıq taraw obektleriniń biri bolǵan Mamıy awıl puqaralar jıyınındaǵı 3-sanlı ulıwma bilim beriw mektebine bardı. Sóylesiw dawamında sońǵı jılları bilimlendiriw tarawında ámelge asırılıp atırǵan jumıslar, perzentlerimizdiń ilimli, bilimli, kámil insanlar bolıp jetilisiwinde mektepte oqıwshılar ushın jaratılǵan sharayatlar boyınsha mektep administraciyası menen sáwbetlesip, olardıń pikir-usınısları tıńlandı.
Ushırasıwlar dawamında Nızamshılıq palatasınıń deputatı Guljan Xalmuratova jergilikli Keńes deputatları menen de ushırasıp, turaqlı komissiyalar tárepinen alıp barılıp atırǵan jumıslar menen tanısıp, jumıstı jáne de janlandırıw boyınsha wazıypalar belgilendi.
Xalıq wákiliniń ushırasıwı Xojeli rayonında da dawam etti. Dáslep ol Jayxun posyolkalıq puqaralar jıyınında bolıp, máhálle jetiligi menen ushırastı. Usı máhálledegi shańaraq turǵınları menen sáwbetlesip, olardıń úy aldı qıytaq jerinen nátiyjeli paydalanıw, qıytaq jer dáramat dáregi ekenin biletuǵın hár bir shańaraq iyesiniń tájiriybeleri, máhálle xalqınıń jerlerdi suwǵarıwdaǵı jumısları hám ushırasıp atırǵan mashqalaları, aymaqtı abadanlastırıw jumısları hám ishki jollardıń ońlawǵa mútáj jaǵdayı úyrenildi.
Ushırasıw usı rayondaǵı sociallıq taraw obektleriniń biri 48-sanlı shańaraqlıq poliklinikada da boldı. Xalıq wákili medicina tarawınıń wákilleri menen sóylesiw procesinde keyingi jılları medicina tarawına qaratılıp atırǵan itibar, ámelge asırılıp atırǵan jumıslar, parlamenttegi jańalıqlar, qabıl etilip atırǵan jańa nızamlardıń mazmun-mánisi boyınsha da tolıq maǵlıwmatlar berip ótti. Bunnan tısqarı, bul shańaraqlıq poliklinikada xalıqqa sapalı medicinalıq xızmet kórsetiw jumısları, nawqaslar ushın jaratılǵan sharayatlar hám mashqalalar úyrenilip, pikir-usınıslar tıńlandı.
Deputat Ózbekstan Respublikası Prezidenti janındaǵı Sociallıq qorǵaw milliy agentligi Qaraqalpaqstan Respublikası Xojeli rayonındaǵı 17-sanlı kóp tarmaqlı qánigelestirilgen mektepke shekemgi bilimlendiriw shólkeminde de bolıp, ol jerde tárbiyalanıp atırǵan balalar ushın jaratılǵan sharayatlar menen tanıstı.
Bul mákemede alıp barılıp atırǵan jumıslar úyrenilip, logoped, defektolog, shıpaker hám tárbiyalanıwshılar menen sáwbetlesip, olardıń jumıs nátiyjeliligin arttırıw boyınsha kerek bolatuǵın metodikalıq qollanbalar, arnawlı úskeneler hám texnikalıq bazanı bekkemlew ushın tiyisli shólkemler menen birgelikte ámeliy sheshimler kóriwge kelisip alındı.
Ushırasıwlar dawamında kóterilgen mashqalalar qadaǵalawǵa alınıp, olardı saplastırıw boyınsha ilajlar belgilep alındı.

Á.Jiyemuratov,
Qaraqalpaqstan xabar agentligi.