Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komitetiniń baslıǵı J.Ayapovtıń basshılıǵında Taxtakópir rayonındaǵı Qaratereń kóline sayaxat shólkemlestirildi.

Turizmdi, ásirese, ishki turizmdi rawajlandırıw búgingi kúnniń eń áhmiyetli máseleleriniń biri bolıp, elimizde bul tarawdı rawajlandırıw, usı baǵdarda tiyisli infrastrukturanı dúnya standartları dárejesinde jaratıw hám turistler aǵımın arttırıw boyınsha bir qatar ilajlar ámelge asırılmaqta.
Taxtakópir rayonındaǵı Qaratereń kóli de respublikamızdaǵı dem alıwshılar ushın burınnan kiyatırǵan eń kóp adam baratuǵın orınlardıń biri edi.
Sońǵı jıllarda usı kól átirapında ámelge asırılǵan, atap aytqanda, infrastrukturanı jaqsılaw, sayaxatshılar ushın qolaylıqlar jaratıw boyınsha ámelge asırılǵan jumıslar bul jerge tek respublikamızdan emes, al basqa wálayatlardan da sayaxatqa keliwshilerdiń sanın arttırmaqta.
Prezidentimizdiń baslaması menen Qaratereń kóli boyında jańadan qurılǵan, hesh jerde uqsası joq milliy kolorittegi «Qaratereń» etno-turistlik kompleksiniń qurılıwı xalqımızdıń milliy miyraslarına, tariyxına degen húkimetimizdiń ayrıqsha itibarı ekenliginen dárek beredi.
Sayaxatqa mádeniyat, sport hám turizm tarawı basshıları, usı kúnge shekem respublikalıq kólemde kásiplik awqamları tárepinen shólkemlestirilgen jarıslarda jeńimpaz bolǵan jaslar qatnastı.
Olar Qaratereń kóli, etnoawıl haqqında maǵlıwmatlar alıp, qatar turǵan qara úylerdi tamashalap, tawǵa kóterilip sayaxat etip, súwretlerge túsip, birge qosıq aytıp kewilli dem aldı.
– Men kásiplik awqamları tárepinen Qaratereń kóline shólkemlestirilgen sayaxatqa kelgenimnen quwanıshlıman. Sayaxat oǵada jaqsı, mazmunlı ótti. Aldın da bul jerge kelip edim. Bul jerdegi tábiyat oǵa da sulıw, hawası jaqsı. Qara úyler de sulıw etip tigilgen eken, gáp joq. Awqatları da mazalı. Usı sayaxattı shólkemlestirgen kásiplik awqamlarına minnetdarshılıq bildiremen,-deydi Nókis olimpia hám paralimpia sport kolledjiniń parajeńil atletika túri boyınsha trener oqıtıwshısı Aziza Joldasbaeva.
Sayaxatshılar ushın úlken qara úyge dasturxan jayılıp, olar stol átirapında sáwbetlesip, pikir alıstı.

Á.Jiyemuratov,
Qaraqalpaqstan xabar agentligi