Ózbekstan Respublikası Prezidentiniń 2024-jıl 23-sentyabrdegi “Kámbaǵallıqtı qısqartıw hám xalıqtıń turmıs abadanlıǵın arttırıw baǵdarındaǵı ilajlardı jańa basqıshqa alıp shıǵıw haqqında”ǵı pármanı hám “Kámbaǵallıqtan abadanlıqqa qaray” baǵdarlamasın ámelge asırıw boyınsha birinshi gezektegi ilajlar haqqında”ǵı qararına muwapıq “Kámbaǵallıqtan abadanlıqqa qaray” baǵdarlaması qabıl etilip, onda respublika dárejesindegi mámleketlik mákemelerdiń basshıları hám olardıń orınbasarların eń awır jaǵdaydaǵı máhállelerge bekitiw belgilengen edi.

Usıǵan muwapıq, Ózbekstan Respublikası Ósimlikler karantini hám qorǵaw agentliginiń direktorı I.Ergashevqa Xojeli rayonındaǵı tórt máhálle biriktirilip, búgingi kúnge shekem xalıqtıń jumıs penen támiyinleniwi, jaslardıń innovaciyalıq hám sanlı texnologiyalarǵa tiykarlanǵan bilim alıwı hám kásip-óner úyreniwi, barlıq qatlamlardıń medicinalıq hám jámiyetlik xızmetlerden paydalanıwı ushın sharayat jaratıw jáne xalıqtıń qıytaq jerlerinen nátiyjeli paydalanıwına járdemlesiw baǵdarında jumıslar ámelge asırılmaqta.
Atap aytqanda, xalıqqa 100 mıń túp miyweli nál, 1100 danadan bel, ketpen, shelek sıyaqlı miynet quralları, 4 dana inkubator, sonday-aq, aymaqlarda egislik jerlerdiń sapasın jáne de jaqsılaw maqsetinde 13 dana motokultivator biypul tarqatıldı. Bunnan tısqarı, máhállelerde ıssıxana xojalıǵın rawajlandırıw baǵdarında hár bir máhállede 100 danadan ıssıxana qurıw rejelestirilgen bolıp, qurılıs jumısları juwmaqlanǵan ıssıxanalardan aymaq xalqı ónimli paydalanbaqta.
Mine, usı iygilikli islerdiń dawamı sıpatında, sonday-aq, máhállede jaslar menen islesiw máselelerin muwapıqlastırıw boyınsha respublikalıq komissiyanıń 2025-jıl 17-marttaǵı “Ayrıqsha islesisiw talap etiletuǵın jaslardı ministrlikler, uyımlar, xojalıq birlespeleri, jergilikli atqarıw hákimiyatı uyımları basshılarına biriktiriw arqalı qollap-quwatlaw ilajları haqqında”ǵı májilis bayanlaması orınlanıwın támiyinlew maqsetinde Qumjıqqın hám Ámiwdárya APJ aymaǵındaǵı eki jasqa agentlik atınan motokultivatorlar tapsırıldı.
– Búgin egislik jerimde paydalanıwım ushın maǵan agentlik basshıları tárepinen multikultivator tapsırıldı. Bul nárse atızlarda jumıs islewim ushın oǵa da paydalı dep esaplayman,-deydi Ámiwdárya APJ turǵını Saparbay Narbaev. – Basshılarımızdıń bizge berip atırǵan usınday járdemleri, qol kómeginiń arqasında jumıslarımız jeńillespekte. Bunnan oǵada minnetdarmız.
Bul baǵdardaǵı ilajlar orınlarda dawam etpekte.

Á.Jiyemuratov,
Qaraqalpaqstan xabar agentligi