28-31-may kúnleri Nókis qalasındaǵı 1-sanlı sport mektebinde sporttıń Belbewli gúres túrinen Ózbekstan Respublikası Prezidenti sıylıǵı ushın jas óspirimler arasında Jáhán hám Aziya chempionatı bolıp ótti.

Jarıstıń dáslepki kúni Jáhán chempionatı boyınsha bellesiwler ótkerilip, bul haqqında bunnan aldınǵı xabarlarımızda tolıq maǵlıwmat bergen edik.
Ótkerilgen Aziya chempionatında ul balalar 10, qızlar 7 salmaq kategoriyası boyınsha bellesip, onda qaraqalpaqstanlı jas palwanlar da jaqsı nátiyjelerdi qolǵa kirgizdi.
Atap aytqanda, ul balalar arasında 45 kg salmaqta bellesiwlerge qatnasqan Isabek Biysenbaev barlıq qarsılasların jeńip shıǵıp, Aziya chempionı atanǵan bolsa, 50 kg da Jasurbek Muratbaev gúmis, usı salmaqta bellesiwlerge túsken Baǵdawlet Dóńesov, 55 kg da Erlan Qallibek, 77 kg da Muwsa Jumamuratov, 85 kg da Aydos Erjanov hám +95 kg da Xojiakbar Raimbaevlar qola medalın qolǵa kirgizdi.
Al, qızlar arasında bolsa, eki palwanımız Aziya chempionlıǵına miyasar boldı. Atap aytqanda, 52 kg salmaqta Gúlnur Amanbaeva hám 63 kg da Aneliya Turdıbavalar barlıq qarsılasların jeńip shıǵıp, sport jankúyerlerin quwanıshqa bóledi.
Sonday-aq, bul jarısta 44 kg salmaqta qatnasqan palwanımız Balziyra Karamatdinova gúmis, 57 kg da Janat Boranbay, +70 kg da Araylım Sharapovalar qola medalın qolǵa kirgizdi.
-Belbewli gúres boyınsha bolıp ótken Jizzaqtaǵı Aziya hám jáhán chempionatına 5 sportshı qatnasıp, sonnan 2 palwanımız Aziya chempionlıǵın, 3 sportshımız jáhán chempionatınıń qola medalın jeńip alǵan edi,-deydi Ózbekstan belbewli gúres federaciyası Qaraqalpaqstan bóliminiń atqarıwshı direktorı Bókenbay Sadwaqasov.-Al, búgingi ótkerilgen jáhán chempionatında bolsa, 3 sportshı qatnasıp, sonnan 44 kg salmaqta Tumaris Qalabaeva hám -70 kg da Aysulıw Qıdırbaevalar jáhán chempionı ataǵına miyasar boldı. Aziya chempionatına bolsa, respublikamızdan 21 sportshı qatnasıp, sonnan 3 sportshımız altın, 2 palwanımız gúmis hám 9 sportshı qola medalların qolǵa kirgizdi. Komanda aǵzalarınıń usınday úlken jetiskenliklerge erisiwinde ózim menen birge, Qayrat, Asılbek hám Qaynarbek Sariev, Shuxrat Sarsenbaev, Ilyas Seytmuratov hám Eset Sadwaqasovlar ózleriniń salmaqlı úleslerin qostı. Bunnan bizler oǵada quwanıshlımız. Pursattan paydalanıp, usınday abıraylı jarıstı respublikamızda ótkergeni ushın húrmetli Prezidentimizge hám respublikamız basshılarına úlken raxmet aytamız.
Ótkerilgen jarıs dawamında óz salmaq kategoriyası boyınsha jeńimpazlar qatarınan orın alǵan sportshılarǵa medal hám bahalı sawǵalar tapsırıldı.

Adilbay Orazov,
Qaraqalpaqstan xabar agentligi sholıwshısı