«1-iyun – xalıqaralıq balalardı qorǵaw kúni» bayramı respublikamız boyınsha orınlarda keń túrde belgilenbekte.

Nókis qalasındaǵı «Imkon» reabilitaciya orayına iye mámleketlik kóp tarmaqlı qánigelestirilgen mektepke shekemgi bilimlendiriw shólkeminde sáne múnásibeti menen bayram ilajı bolıp ótti.

Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, bul jerde tárbiyalanıp atırǵan balalardı bayram menen qutlıqladı.
Aytıp ótiw orınlı, búgingi kúni elimizde Ózbekstan Respublikası Prezidentiniń basshılıǵında balalardıń bilim alıwı, salamatlıǵınıń bekkem bolıwı, bárkamal insan bolıp jetilisiwi ushın kóplegen iygilikli isler ámelge asırılmaqta. Eń shetki aymaqlarda da zamanagóy balalar baqshaları, mektepler, mádeniyat hám sport obektleri qurılıp paydalanıwǵa tapsırılıp, olarda balalarımız zaman talabına say tálim-tárbiya almaqta.
Elimizde hesh bir bala itibardan shette qalmaydı. Aralboyı balaları ushın arnawlı qurılǵan bul reabilitaciya orayına iye balalar baqshasında da bir qatar tárbiyalanıwshılar oqıp bilim alıw menen birge, óz salamatlıqların tiklep atır. Orayda balalar ushın barlıq qolaylı sharayatlar jaratılıp, olardıń salamatlıǵı turaqlı qadaǵalawǵa alınǵan hám bul jolda tájiriybeli medicina xızmetkerleri menen pedagog-tárbiyashılar kún-túni ayanbastan xızmet islemekte.
“Imkon” shólkeminde ótkerilgen ilajda respublikamız Basshısı tárepinen balalarǵa bayram múnásibeti menen sawǵalar tapsırıldı.
Bayram ilajı balalardıń atqarıwındaǵı koncert baǵdarlaması menen dawam etti.

Qaraqalpaqstan xabar agentligi