Qazaqstan Respublikası paytaxtında Astana xalıqaralıq forumı (AIF – 2025) bolıp ótpekte.

“AIF – 2025″te 600 ge shamalas sırt el miymanları, sonıń ishinde, jetekshi siyasatshılar, xalıqaralıq shólkemler, korporaciyalar, investorlar hám ilimiy jámiyetshilik wákilleri qatnaspaqta.
Forum baǵdarlaması zamanımızdıń tiykarǵı mashqalaların qamtıp alǵan. Ilaj sheńberinde jalpı májilis hám 25 dodalaw hám pikirlesiwlerge tiykarlanǵan sóylesiw maydanları shólkemlestirildi.
Ilajdıń kúni keshe bolıp ótken ashılıw máresiminde Qazaqstan Prezidenti Qasım-Jomart Toqaev, Ruanda, Arqa Makedoniya Prezidentleri, basqa da mámleketlerdiń bas ministrleri, orınbasarları, xalıqaralıq shólkemlerdiń wákilleri qatnastı.
70 ten aslam mámleketten kelgen jetekshi málimleme agentlikleri, telekanallar hám basqa da ǵalaba xabar qurallarınıń xızmetkerleri forum jumısın tikkeley sáwlelendirip barmaqta.
Búgin de forum óz jumısın dawam ettirmekte. Qazaqstan Respublikasına rásmiy sapar menen kelgen Italiya Ministrler Keńesiniń baslıǵı Jorja Meloni Qasım-Jomart Toqaev penen birge forumnıń arnawlı sessiyasında qatnastı.
Italiya Bas ministri házirgi geosiyasiy jaǵday hám regionallıq birge islesiw haqqında shıǵıp sóyledi.
Búgin Astanaǵa Ózbekstan Respublikası Prezidenti Shavkat Mirziyoevtiń saparı kútilmekte.
Mámleketimiz basshısı Qazaqstan Respublikası Prezidenti Qasım-Jomart Toqaevtıń mirát etiwine bola 30-may kúni Astana qalasında bolıp ótetuǵın “Oraylıq Aziya – Italiya” formatındaǵı joqarı dárejedegi sammitte qatnasadı.
Ulıwma, búgin Astana qalası sırtqı siyasat hám xalıqaralıq qáwipsizlik, energetika hám klimat ózgeriwi, ekonomika hám qarjı sıyaqlı global máselelerdi dodalaw qızǵın dawam etip atırǵan áhmiyetli sóylesiw maydanına aylanǵan.

Norgul Abduraimova, ÓzA
Tashkent – Astana