Aldın xabar bergenimizdey, Qıtay Xalıq Respublikasınıń Dongiing qalasında «Yellow River Estuary» xalıqaralıq birge islesiw hám almasıw boyınsha dos qalalar konferenciyası bolıp ótti.

Bul xalıqaralıq ilajda Qaraqalpaqstan Respublikası delegaciyası menen birgelikte Berdaq atındaǵı Qaraqalpaq mámleketlik universitetiniń xalıqaralıq birge islesiw boyınsha prorektorı T.Nurımbetov ta qatnasıp, sapar sheńberinde bir qatar áhmiyetli ushırasıwlar hám sóylesiwler ótkerdi.
Atap aytqanda, konferenciya dawamında «Sarı dárya deltası» intellektuallıq awıl xojalıǵı texnikası sanaatı akademiyası hám Berdaq atındaǵı Qaraqalpaq mámleketlik universiteti arasında birge islesiw haqqında memorandumǵa qol qoyıldı.
-Bul hújjet tárepler arasında óz-ara ilimiy-izertlew joybarların ámelge asırıw, professor-oqıtıwshılar hám studentlerdiń akademiyalıq almasıwı, awıl xojalıǵı texnologiyaları boyınsha innovaciyalıq joybarlardı birgelikte islep shıǵıw hám ámeliyatqa engiziwdi názerde tutadı,-deydi QMU prorektorı Timur Nurımbetov.- Bunday birge islesiw tek ǵana universitet kóleminde emes, al ulıwma alǵanda, Ózbekstan hám Qıtay arasındaǵı ilimiy-bilimlendiriw baylanısların rawajlandırıwǵa xızmet etedi.
Bunda awıl xojalıǵı tarawında aldıńǵı texnologiyalardı tartıw arqalı Qaraqalpaqstanda awıl xojalıǵı ónimdarlıǵın arttırıw hám turaqlı rawajlanıwı támiyinlenedi. Berdaq atındaǵı Qaraqalpaq mámleketlik universitetiniń xalıqaralıq maydandaǵı belsene qatnasıwı, sırt elli birge islesiwshiler menen baylanıslar, jaslarımızǵa sapalı bilim beriw, zamanagóy ilim jetiskenliklerin ózlestiriwde áhmiyetli orın iyelemekte. Bul qol qoyılǵan memorandum universitet tariyxında jáne bir áhmiyetli basqısh bolıp, xalıqaralıq integraciya processleriniń jáne bir ámeliy kórinisi bolıp esaplanadı.

Qaraqalpaqstan xabar agentligi