Puqaralar jıyınları basshıların saylaw ilajı Nókis qalasındaǵı Anasay mákan puqalalar jıyınında da bolıp ótti.

Anasay MPJ qaladaǵı shetki máhállelerdiń biri bolıp, házirgi waqıtta onda 1128 xojalıqta 5935 adam jasap atır.
Saylawda usı aymaqta jasawshı 400 den aslam puqaralar qatnasıp, dáslep tártip-qaǵıydalarǵa bola puqaralar jıyını baslıǵın saylawdı shólkemlestiriw hám onı ótkeriw boyınsha jumısshı topar basshısı hám puqaralar wákillerinen ibarat quramda prezidium aǵzaları, sanaq komissiyası saylandı.
Anasay MPJ baslıǵı lawazımına talabanlar Gúlnara Esebaeva, Bahadır Bekniyazov hám Ayapbergen Ayımbetovlardıń bayanatları tıńlanıp, miynet jolı hám aldaǵı rejeleri tuwralı maǵlıwmatlar berildi. Sózge shıqqan aymaq turǵınları da talabanlar tuwralı pikirlerin bildirip ótti.
Saylaw belgilengen tártip-qaǵıydalarǵa muwapıq ótkerilip, onıń barısı komissiya aǵzaları tárepinen baqlap barıldı.
Saylaw nátiyjelerine bola Ayapbergen Ayımbetov saylawshılardıń 234 dawısına iye bolıp, 5 jıl múddetke Anasay mákan puqaralar jıyını baslıǵı lawazımına saylandı.
Orınlarda puqaralar jıyınları basshıların saylaw ilajları dawam etpekte.

Á.Jiyemuratov,
Qaraqalpaqstan xabar agentligi