Beruniy rayonında medicinada grantlardıń áhmiyeti boyınsha oqıw-seminarı bolıp ótti.

Seminarǵa Qaraqalpaqstan Respublikası Ministrler Keńesiniń Sırtqı biyǵárez járdem qarjıların (grantlardı) tartıw hám donorlar menen islesiw bóliminiń bas qánigesi N.Abipov, Densawlıqtı saqlaw ministrliginiń investiciyalardı tartıw hám mámleketlik-jeke menshik sheriklik hám autsorsingti rawajlandırıw sektorınıń bas qánigesi Z.Palwaniyazova, Ózbekstan Miyirbiykeler associaciyasınıń Qaraqalpaqstan bólimi baslıǵı R.Mishenova hám medicina xızmetkerleri qatnastı.
Onda Beruniy, Ellikqala, Ámiwdárya, Tórtkúl rayonlıq medicina birlespeleriniń basshılarına Qaraqalpaqstan Respublikası Densawlıqtı saqlaw ministrligi xızmetkerleri tárepinen, tarawdaǵı qararlardıń orınlanıwın támiyinlew hám grant baǵdarlamaların úyreniw arqalı medicinaǵa jańa joybarlardı alıp kiriw boyınsha maǵlıwmatlar berildi.
Seminardıń tiykarǵı maqseti qatnasıwshılarǵa xalıqaralıq grantlardı izlew hám shólkemlestiriw, grantlar ushın buyırtpalar tayarlaw hám tapsırıw, grant joybarların muwapıqlastırıw hám basqarıw, qarjı, esap-sanaq hám grantlar boyınsha esabat tapsırıw, grant joybarlarınıń nátiyjeliligin monitoring etiw hám bahalaw, xalıqaralıq donorlar hám birge islesiwshiler menen óz-ara sóylesiw máseleleri boyınsha túsinikler beriwden ibarat.
Sonday-aq, seminarda Germaniya mámleketinen Beata Berriy xanım onlayn qatnasıp, sırt el medicina mákemelerine orta medicina xızmetkerlerin tayarlaw hám shet tilin úyretiw jáne jumısqa tartıw boyınsha keń túrde túsinikler berdi.
Seminar dawamında qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi.