Búgin Qazaqstan Respublikasınıń Astana qalasında «Ózbekneftgaz» akcionerlik jámiyeti basqarma baslıǵı basshılıǵındaǵı delegaciyanıń rásmiy ushırasıwları ótkerildi.

Jámiyet málimleme xızmetiniń málim etiwinshe, bul sapar etiw sheńberinde delegaciya dekarbonizaciya hám turaqlı rawajlanıw baslamaları boyınsha tórt tárepleme birge islesiw shártnamasına qol qoyıw máresimi hám Qazaqstan Prezidenti qáwenderliginde ótkerilgen Astana xalıqaralıq forumında qatnastı.
Iri kelisimge «Ózbekneftgaz» AJ, «QazMunayGaz» AJ, Rossiyanıń «Tatneft» AJ hám Ázerbayjannıń SOCAR kompaniyası arasında qol qoyıldı. Bul shártnama neft-gaz tarawında uglerod shıǵındıların azaytıw, turaqlı hám ekologiyalıq sheshimlerdi engiziw, sonday-aq, aldıńǵı texnologiyalardı turmısqa engiziw boyınsha birgeliktegi baslamalardı ámelge asırıwdı názerde tutadı.
Ásirese, «Ózbekneftgaz» AJ hám «QazMunayGaz» arasındaǵı sheriklik izbe-iz rawajlanıp, jáne de joqarı basqıshqa kóterilip atırǵanı ayrıqsha itibarǵa ılayıq. Házirgi waqıtta birge islesiw geologiyalıq-izlew jumısları, gaz-ximiya tarawın rawajlandırıw, lokalizaciyalaw, innovaciya hám ekologiyalıq texnologiyalardı keńnen engiziw sıyaqlı baǵdarlardı qamtıp almaqta.
Ushırasıwlar barısında tárepler óz-ara máplerdi bunnan bılay da bekkemlep, jańa joybarlar hám baslamalardı ámelge asırıw niyetinde ekenligin bildirdi. Bul process eki mámleket energetika tarawınıń turaqlı rawajlanıwı ushın strategiyalıq áhmiyetke iye ekenin jáne bir márte dálilledi.
Astana qalasındaǵı ushırasıwlar «Ózbekneftgaz» AJ delegaciyası ushın «Tatneft» hám SOCAR basshıları menen eki tárepleme sóylesiwler ótkeriw imkaniyatın da jarattı.

N.Ziyodullaeva ÓzAnıń xabarshısı