Búgin, 2025-jıl 28-may kúni Tashkent qalasında Ózbekstan Respublikası Oliy Majlisi Senatınıń jetinshi jalpı májilisi óz jumısın basladı.

Onda Senat hám Húkimet aǵzaları, ministrlikler hám uyımlardıń basshıları, ǵalaba xabar qurallarınıń wákilleri qatnaspaqta.
Senat Baslıǵı Tanzila Norboeva basqarıp atırǵan májilis videokonferencbaylanıs sistemasınan paydalanǵan halda ótkerilmekte. Májilis processleri Senattıń YouTube tarmaǵındaǵı rásmiy beti arqalı onlayn jarıtıp barılmaqta.
Haywanlardı identifikaciyalaw, dizimge alıw hám baqlaw sistemasın engiziw boyınsha jańa nızam da senatorlar tárepinen kórip shıǵıladı.
Kún tártibinen Ózbekstan Respublikası menen Birlesken Arab Ámirlikleri arasında puqaralıq hám ekonomikalıq isler boyınsha huqıqıy járdem kórsetiw haqqındaǵı Kelisimdi ratifikaciyalaw máselesi de orın alǵan.
Májilis kún tártibi sheńberinde tiykarǵı xalıqaralıq reytingler hám indekslerde Ózbekstannıń ornı jaqsılanıwı haqqındaǵı milliy bayanat jáne Ekonomika hám qarjı ministrliginiń mámleket aymaqlarında xızmetler tarawın rawajlandırıw boyınsha ámelge asırılǵan jumıslar haqqındaǵı málimlemesi tıńlanadı.
Bunnan tısqarı, Senattıń jergilikli hákimiyat wákillikli uyımlarınıń jumısın kúsheytiwge járdemlesiw komissiyasınıń jergilikli keńeslerdiń jumısına ámeliy hám metodikalıq jaqtan járdemlesiw baǵdarında ámelge asırǵan jumısları haqqındaǵı málimlemesi tıńlanadı.
Balalarǵa kórsetilip atırǵan medicinalıq járdemniń sapasın jaqsılaw, aymaqlardaǵı balalar kóp tarmaqlı medicina orayların tar sheńberdegi qánigeler menen, materiallıq-texnikalıq jaǵday talapqa juwap bermeytuǵın ayırım medicina mákemelerin bolsa zamanagóy joqarı texnologiyalıq úskeneler menen támiyinlewge qaratılǵan ilajlar boyınsha Densawlıqtı saqlaw ministrligine parlamentlik soraw jiberiw máselesi de kórip shıǵıladı.
Májiliste kórip shıǵılatuǵın barlıq máselelerdi tolıq sáwlelendirip baramız. Bizdi baqlap barıń!

Norgul Abduraimova,
Nosirjon Haydarov (súwret),
ÓzA