Qıtay Xalıq Respublikasınıń Dongiing qalasında “Yellow River Estuary” xalıqaralıq birge islesiw hám almasıw boyınsha dos qalalar konferenciyası bolıp ótpekte. Bul abıraylı xalıqaralıq ilajda túrli mámleketlerden wákiller, sonıń ishinde, Qaraqalpaqstan Respublikası delegaciyası da qatnaspaqta.

Konferenciya sheńberinde qatnasıwshılar óz-ara birge islesiwdi bekkemlew, ekonomikalıq, mádeniy hám ilimiy tarawlarda tájiriybe almasıw, sonday-aq, turaqlı rawajlanıw jolında jańa baslamalardı alǵa qoyıw máselelerin dodalamaqta. Ilaj, ásirese, qorshaǵan ortalıqtı qorǵaw, jasıl ekonomika, suw resurslarınan aqılǵa uǵras paydalanıw hám qalalar aralıq turaqlı baylanıslardı rawajlandırıwǵa qaratılǵan.
Respublikamız delegaciyası quramında Berdaq atındaǵı Qaraqalpaq mámleketlik universitetiniń xalıqaralıq birge islesiw boyınsha prorektorı T.Nurımbetov ta qatnaspaqta. Ol bul konferenciyada joqarı bilimlendiriw orınları arasındaǵı xalıqaralıq baylanıslardı rawajlandırıw, ilimiy almasıw hám birgeliktegi joybarlardı jolǵa qoyıw boyınsha bir qatar ushırasıwlardı ótkermekte.
Konferenciya dawamında Berdaq atındaǵı Qaraqalpaq mámleketlik universiteti hám Qıtaydıń jetekshi joqarı oqıw orınları arasında birge islesiw memorandumına qol qoyılıwı rejelestirilgen bolıp, bul eki tárepleme ilimiy-innovaciyalıq joybarlardı ámelge asırıw, studentler hám professor-oqıtıwshılar almasıwın jolǵa qoyıw imkaniyatın beredi.
-Bul xalıqaralıq forum Ózbekstannıń, ásirese, Qaraqalpaqstan regionınıń xalıqaralıq birge islesiwdegi belsendiligin kórsetedi hám jańa strategiyalıq baslamalardı ámelge asırıwǵa xızmet etedi,-deydi Berdaq atındaǵı Qaraqalpaq mámleketlik universitetiniń xalıqaralıq birge islesiw boyınsha prorektorı T.Nurımbetov.
Ilaj ele dawam etpekte.

Qaraqalpaqstan xabar agentligi