Múnásibet

Búgingi kúnde Ózbekstan xalıqaralıq maydanda izbe-iz hám pragmatikalıq sırtqı siyasat alıp barıp, dúnya mámleketleri menen hár tárepleme paydalı qatnasıqlardı bekkemlep barmaqta. Prezidentimiz Shavkat Mirziyoevtiń baslamaları menen elimizde barlıq aymaqlardıń ekonomikalıq hám investiciyalıq imkaniyatların ashıp beriwge ayrıqsha itibar qaratılmaqta. Ásirese, Qaraqalpaqstan Respublikasındaǵı keń kólemli reformalar hám jedel rawajlanıw processleri xalıqaralıq sheriklerdiń itibarında.
Usı kózqarastan Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵındaǵı delegaciyanıń Birlesken Arab Ámirliklerine saparı úlken áhmiyetke iye. Bul sapar etiw Prezidentimizdiń tapsırmasına muwapıq ámelge asırıldı hám ol eki tárepleme birge islesiwdi jańa basqıshqa alıp shıǵıwǵa xızmet etetuǵını sózsiz.
Sapar sheńberinde Qaraqalpaqstan delegaciyası BAÁdegi bir qatar jetekshi mámleketlik hám jeke menshik sektor wákilleri, sonıń ishinde, investiciya, turizm, ekologiya, densawlıqtı saqlaw hám bilimlendiriw tarawlarında jumıs alıp barıp atırǵan shólkemler menen sóylesiwler alıp bardı. Qaraqalpaqstandaǵı óz-ara paydalı joybarlar, atap aytqanda, turizm infrastrukturasın rawajlandırıw, zamanagóy klinikalar qurıw, jasıl energetika hám IT tarawlarındaǵı imkaniyatlardı tanıstırıw joqarı bahalandı.
Sonday-aq, BAÁ niń eń iri investiciyalıq kompaniyaları menen bolıp ótken ushırasıwlarda Qaraqalpaqstan aymaǵına investiciyalardı tartıw, azıq-awqat qáwipsizligi, suw resurslarınan nátiyjeli paydalanıw hám ekologiyalıq turaqlılıqtı támiyinlewge baylanıslı máseleler dodalandı. Qaraqalpaqstannıń bay tábiyǵıy resursları, qolaylı geografiyalıq jaylasıwı hám joqarı potencialǵa iye insan kapitalı BAÁ isbilermenleri ushın úlken qızıǵıwshılıq oyatpaqta. Itibarlı tárepi sonda, sapar dawamında bir qatar birgeliktegi joybarlardı ámelge asırıw boyınsha kelisimlerge erisildi. Atap aytqanda, densawlıqtı saqlaw sistemasın jetilistiriw sheńberinde Nókis qalasında qurılıp atırǵan bahası 28 million dollarlıq “Ana hám bala” klinikası usı jılı óz jumısın baslaydı.
Qaraqalpaqstan Respublikası delegaciyasınıń BAÁǵa saparı tek ǵana ekonomikalıq emes, al mádeniy-gumanitarlıq tarawlarda da eki mámleket arasındaǵı birge islesiwdi jańa basqıshqa alıp shıǵıwı kútilmekte. BAÁ tájiriybesin Qaraqalpaqstanda engiziw – zamanagóy basqarıw, texnologiyalıq rawajlanıw hám innovaciyalıq qatnaslardı engiziwde áhmiyetli orın iyeleydi. Hár qanday sociallıq-ekonomikalıq ózgeristiń orayında insan mápi, onıń salamatlıǵı, bilim alıwı hám múnásip turmıs keshiriwi jatadı.
Ásirese, Abu-Dabi (ADFD) rawajlanıw fondı basshıları menen ushırasıwda Qaraqalpaqstanda birgeliktegi texnoparkler, oqıw orayların ashıw, jol qurılısı, ekologiyalıq jaǵday, suw támiynatın jaqsılaw, awıl xojalıǵı ónimlerin eksport etiwde birgeliktegi joybarlardı ámelge asırıw boyınsha sóylesiwler alıp barılǵanlıǵı respublikamızdıń rawajlanıw basqıshı ushın oǵada áhmiyetli kelisimlerden biri boldı. Sonday-aq, regionnıń eń úlken mashqalası – Aral teńiziniń Batıs bólegin saqlap qalıw máseleleri dodalanǵanı ekologiyalıq qıyın sharayattı jumsartıwǵa qaratılǵan jáne bir qádem boldı, dep esaplaw orınlı.
Bul sapar etiw tek ǵana joqarı dárejedegi diplomatiyalıq sóylesiw emes, al strategiyalıq birge islesiwge qoyılǵan isenimli qádem bolıp esaplanadı. Bul sapar etiw elimizdiń barlıq aymaqları qatarında Qaraqalpaqstannıń da global kólemde óz ornın bekkemlep atırǵanınan dárek beredi.

Orıngúl Allabergenova, Qaraqalpaqstan Respublikası Joqarǵı Keńesiniń deputatı
Qaraqalpaqstan xabar agentligi