Oliy Majlis Nızamshılıq palatasındaǵı ÓzMTDP frakciyasınıń gezektegi májilisinde bir qatar nızam joybarları qızǵın dodalandı. Májilis aldında mámleketimiz basshısınıń Vengriya hám Sloveniyaǵa saparlarınıń áhmiyetine toqtap ótti.

Atap ótilgenindey, Ózbekstan – Vengriya arasındaǵı strategiyalıq hám kóp táreplemeli birge islesiw jáne de bekkemlenip, ámeliy birge islesiw barlıq baǵdarlarda izbe-iz rawajlanıp barmaqta. Sonıń ishinde, parlamentler, húkimetler, uyımlar hám aymaqlar dárejesinde nátiyjeli baylanıslar jolǵa qoyılǵan, BMSh, Túrkiy mámleketler shólkemi hám basqa da xalıqaralıq strukturalar sheńberinde tıǵız birge islesip kelinbekte. Eki mámleket arasında óz-ara sawda kólemi artıp atırǵanı, ekonomikanıń túrli tarmaqlarında jetekshi kárxanalardıń kooperaciyası kúsheyip atırǵanı atap ótildi.
Sonday-aq, Ózbekstan – Vengriya Isbilermenler keńesiniń jumısın qayta tiklew hám jaqın waqıtta onıń gezektegi májilisin ótkeriw, aymaqlararalıq baylanıslardı xoshametlew maqsetinde Vengriyada ekinshi forumǵa puqta tayarlıq kóriw boyınsha erisilgen kelisimler eki mámleket arasındaǵı baylanıslardı bunnan bılay da rawajlandıratuǵını atap ótildi.
Sońǵı 20 jıl dawamında birinshi márte ótkerilgen Ózbekstan – Sloveniya arasındaǵı joqarı dárejedegi ilajlarda erisilgen kelisimler de tariyxıy áhmiyetke iye. Ushırasıw dawamında Sloveniyanıń jetekshi kompaniyaları menen Sanaat kooperaciyası baǵdarlamasın qabıl etiw, sonday-aq, zamanagóy ásbap-úskeneler, sanaat hám awıl xojalıǵı ónimlerin islep shıǵarıw, farmacevtika ónimleri, sonıń ishinde, pal hám shıpalı ósimliklerge tiykarlanǵan dári islep shıǵarıwdı lokalizaciyalaw, energetika obektlerin qurıw hám modernizaciyalaw boyınsha joybarlardı ámelge asırıw boyınsha kelisimlerge erisildi.

– Házirgi waqıtta Ózbekstan Jáhán sawda shólkemine kiriw boyınsha Evropa Awqamı mámleketleri menen sóylesiwler ótkermekte. Bul eki mámleket Evropa Awqamınıń aǵzası esaplanadı. Usı jaǵınan bul sapar etiwler, álbette, mámleketimizdiń JSShǵa tezirek aǵza bolıwında ayrıqsha áhmiyetke iye, – dedi frakciya aǵzası Nodir Tilavoldiev.
Frakciya aǵzaları tárepinen hár eki sapar dawamında erisilgen kelisimler mámleketimizdiń sociallıq-ekonomikalıq rawajlanıwında úlken áhmiyetke iye ekeni ayrıqsha atap ótildi.

ÓzA