Nókiste Qaraqalpaqstan Respublikası Joqarǵı Keńesi Isbilermenler háreketi – Ózbekstan Liberal-demokratiyalıq partiyası frakciyasınıń májilisi bolıp ótti.

Onda frakciya aǵzaları, ÓzLiDeP Qaraqalpaqstan Respublikası Keńesi, qalalıq hám rayonlıq Keńeslerin apparat baslıqları, xalıq deputatları qalalıq hám rayonlıq Keńesindegi ÓzLiDeP deputatlıq toparınıń aǵzaları hám ǵalaba xabar qurallarınıń wákilleri qatnastı.
Kún tártibinde Ózbekstan Respublikası Prezidentiniń 2024-jıl 16-fevraldaǵı “Respublikada azıq-awqat qáwipsizligin támiyinlewdiń qosımsha ilajları haqqında”ǵı pármanınıń orınlanıwı boyınsha Qaraqalpaqstan Respublikası Awıl xojalıǵı ministrliginiń esabatı, Ózbekstan Respublikası Prezidentiniń 2024-jıl 30-apreldegi “2024-jılda ipoteka kreditlerin ajıratıw mexanizmlerin jetilistiriw hám xalıqtıń turaq jay sharayatların jaqsılawǵa baylanıslı qosımsha ilajlar haqqında”ǵı pármanınıń orınlanıwı boyınsha Qaraqalpaqstan Respublikası qurılıs hám turaq jay kommunal xojalıǵı ministriniń esabatı, Ózbekstan Respublikası Prezidentiniń 2024-jıl 5-apreldegi “Jaslarǵa jer ajıratıw arqalı olardıń dáramatların arttırıw hám bántligin támiyinlew, sonday-aq, jańa jer maydanların ózlestiriw ilajları haqqında”ǵı qararınıń orınlanıwı boyınsha Jaslar isleri agentligi Qaraqalpaqstan Respublikası basqarması baslıǵınıń esabatı haqqındaǵı máseleler kórip shıǵıldı.
Májiliste Qaraqalpaqstan Respublikası awıl xojalıǵı ministriniń birinshi orınbasarı A.Qaziev, Qaraqalpaqstan Respublikası qurılıs hám turaq jay kommunal xojalıǵı ministriniń orınbasarı A.Urazımbetov hám Jaslar isleri agentligi Qaraqalpaqstan Respublikası basqarması baslıǵınıń orınbasarı M.Tursunovlardıń mámleketimiz basshısınıń joqarıda atap ótilgen párman hám qararları sheńberinde ámelge asırılǵan jumıslar boyınsha bayanatları tıńlandı. Bul máselelerdi Qaraqalpaqstan Respublikası Joqarǵı Keńesiniń gezektegi sessiyasınıń kún tártibine usınıw boyınsha tiyisli qararlar qabıl etildi.
Kún tártibindegi máseleler boyınsha pikir-usınıslar bildirilip, bul baǵdarda ushırasıp atırǵan kemshiliklerdi saplastırıw boyınsha ilajlar belgilendi.

ÓzA