Oliy Majlis Senatında parlament joqarı palatasınıń basshısı Tanzila Norboeva Miyrastı qorǵaw xalıqaralıq alyansı – ALIPH Keńesiniń baslıǵı, Franciya Prezidentiniń keńesgóyi Bariza Hiari menen ushırastı.

Sóylesiw waqtında Ózbekstan hám Franciya arasında eki tárepleme qatnasıqlardı bunnan bılay da rawajlandırıw, mádeniy-gumanitarlıq tarawdaǵı birge islesiwdi tereńlestiriw perspektivaları dodalandı. Kórkem óner, mádeniyatlararalıq qarım-qatnas hám tariyxıy-mádeniy miyrastı qásterlep saqlaw baǵdarında birgeliktegi baslamalardı keńeytiw máselelerine ayrıqsha itibar qaratıldı.
Jańa restavraciya baslamaları, jaslar hám volontyorlardı miyrastı qásterlep saqlawǵa tartıw baǵdarlamaları, sonday-aq, qánigelerdiń professional dárejesin arttırıwǵa qaratılǵan qospa joybarlar arqalı birge islesiwdi keńeytiw perspektivaları da dodalandı.
Ushırasıw sheńberinde joqarı dárejedegi turaqlı eki tárepleme sóylesiw hám almasıwlar tiykarında dawam etip atırǵan parlamentleraralıq birge islesiwdi rawajlandırıw máselelerine de toqtap ótildi. Parlamentlerdiń tiyisli komitetleri hám doslıq toparları arqalı birge islesiwdi jedellestiriw zárúrligi atap ótildi.
Ushırasıw juwmaqları boyınsha tárepler eki mámleket xalıqları arasındaǵı doslıq hám óz-ara awızbirshilikti bekkemlewge xızmet etetuǵın mádeniyat, kórkem óner hám mádeniyatlararalıq qarım-qatnas tarawındaǵı sheriklikti bunnan bılay da rawajlandırıw hám birge islesiwdi keńeytiwden óz-ara mápdar ekenin bildirdi.
* * *
Sonday-aq, 26-may kúni Senat Baslıǵı Tanzila Norboeva BMSh Bas xatkeriniń orınbasarı, BMSh Rawajlanıw baǵdarlaması administratorınıń orınbasarı Xaolyan Cyuy menen ushırasıw ótkerdi.
Sóylesiw dawamında Ózbekstan hám BMSh Rawajlanıw baǵdarlaması arasındaǵı ámeldegi birge islesiwge joqarı baha berildi. Búgingi kúnde elimizde ulıwma bahası 163 million AQSh dollarınan aslam 43 joybar ámelge asırılıp atırǵanı atap ótildi. Bul bolsa region mámleketleri arasında eń úlken kórsetkishlerden biri ekeni atap ótildi.
Bul joybarlar jaslardıń sanlı sawatlılıǵın arttırıw, hayal-qızlardı ekonomikalıq qollap-quwatlaw, densawlıqtı saqlaw sistemasın modernizaciyalaw, mámleketlik xızmetlerdiń sapasın jaqsılaw sıyaqlı áhmiyetli baǵdarlardı qamtıp alǵan.
Táreplerdiń 2021-2025-jıllarǵa mólsherlengen Mámleketlik baǵdarlama sheńberinde sheriklikti bunnan bılay da tereńlestiriwge sadıqlıǵı atap ótildi. Ekologiyalıq turaqlılıqtı támiyinlew, Aral apatshılıǵı aqıbetlerin jumsartıw, gender teńlikti alǵa qoyıw hám Turaqlı rawajlanıw maqsetlerine erisiw sıyaqlı tiykarǵı baǵdarlarǵa ayrıqsha itibar qaratıldı.
* * *
26-may kúni Oliy Majlis Senatınıń Baslıǵı Tanzila Norboeva Birlesken Milletler Shólkeminiń Balalar qorı (YuNISEF) atqarıwshı direktorı Ketrin Rassel menen ushırasıw ótkerdi.
Sóylesiw waqtında Ózbekstan hám YuNISEF arasında balalardıń huqıqların qorǵaw, sociallıq qorǵaw sistemasın jetilistiriw, ana hám bala salamatlıǵın qorǵaw, inklyuziv hám sapalı bilimlendiriwdi engiziwge qaratılǵan birge islesiwdi rawajlandırıw hám bekkemlew máseleleri hár tárepleme dodalandı.
Imkaniyatı sheklengen balalardı sociallıq qorǵaw, inklyuziv joybarlardı ámelge asırıw, tarawda kadrlar tayarlaw hám mamanlıǵın arttırıw máselelerine ayrıqsha itibar qaratıldı.
Tárepler balalardıń huqıqları menen nızamlı máplerin qorǵawǵa qaratılǵan xalıqaralıq forumlar menen ilajlardı shólkemlestiriw hám ótkeriw boyınsha birgelikte ámelge asırılatuǵın jumıslardı jedellestiriwden óz-ara mápdar ekenin tastıyıqladı.
Ushırasıw juwmaǵında ámeliy joybarlardı ámelge asırıw arqalı Ózbekstan hám YuNISEF arasında konstruktivlik hám nátiyjeli birge islesiwdi bekkemlewge kelisip alındı.

Qaraqalpaqstan xabar agentligi