Ámiwdárya rayonında nawqan qurtın baǵıw hám pille jetistiriw tarawı jedel rawajlanıp, respublikadaǵı eń belsendi aymaqlardan biri sıpatında tán alınbaqta. Bıyılǵı jılı pille jetistiriw rejesi 296 tonna bolıp, 2658 shańaraqta 4936 qutı nawqan qurtı tárbiyalanbaqta, – dep maǵlıwmat beredi rayon hákimligi Málimleme xızmeti bólimi.

Ásirese, Dwrman awılı xalqı pilleshilikti oraylasqan sistema tiykarında shólkemlestiriwge hám awızbirshilikti bekkemlewge ayrıqsha itibar bermekte. Hár jılı awılda bánt bolmaǵan hayal-qızlar bos turǵan imaratlarda nawqan qurtın baǵıw menen shuǵıllanıp, dáramat dáregin keńeytpekte.
Usı jıldıń dáslepki aylarında 15 hayal-qız 20 qutı nawqan qurtın tárbiyalap, pille jetistiriw procesinde belsendilik kórsetpekte.
Rayon hákiminiń birinshi orınbasarı F.Yusupov pilleshilikti rawajlandırıw maqsetinde shólkemlestirilgen jumıs procesine barıp, pilleshilik tek ǵana ekonomikalıq payda dáregi emes, al hayal-qızlar hám jaslar ushın jumıs ornı ekenin atap ótti. Bul taraw xızmetkerleriniń miyneti ayrıqsha qádirlenetuǵının bildirdi.
Ilaj dawamında pilleshilik penen shuǵıllanıp atırǵan belsendiler hám tájiriybeli pillekeshler sapalı ónimleri ushın estelik sawǵaları menen sıylıqlandı. Olardıń arasında uzaq jıllardan berli nawqan qurtın tárbiyalaw menen shuǵıllanıp kiyatırǵan nuraniy analar da bolıp, bul itibar olardı jáne de miynetke ilhamlandırmaqta.

Qaraqalpaqstan xabar agentligi