Tórtkúl rayonı hákimi I.Xudaybergenov hám tiyisli shólkemlerdiń juwapkerleri rayon orayınan uzaqta jaylasqan “Paxtaabad” awıl puqaralar jıyınında bolıp, xalıqtıń turmısı hám sociallıq infrastruktura menen jaqınnan tanıstı, – dep maǵlıwmat beredi Tórtkúl rayonı hákimligi Málimleme xızmeti bólimi.

Sapar dawamında hákim xalıqtıń turmıs tárizin, qıytaq jerlerden paydalanıw jaǵdayın, sonday-aq, aymaqtaǵı 48-sanlı ulıwma orta bilim beriw mektebi, mektepke shekemgi bilimlendiriw mákemesi, awıllıq shańaraqlıq poliklinika hám sawda orınlarınıń jumısın kózden ótkerdi.
Sonday-aq, qıytaq jerlerden paydalanıw jaǵdayına ayrıqsha itibar qarattı. Hákim qıytaq jerlerden ónimli hám nátiyjeli paydalanıw boyınsha ámelge asırılǵan jumıslar menen tanısıp, bul baǵdarda bir qatar tapsırmalar berdi.
Bunnan tısqarı, juwapkerler “Jambasqala” awıl puqaralar jıyınında jasawshı, uzaq jıllardan berli awır kesellikke shatılǵan, 1957-jılı tuwılǵan Bazargúl ana Ertokaeva shańaraǵında bolıp, ana menen qızǵın sáwbetlesti hám onıń densawlıǵınan xabar aldı.
Tórtkúl rayonında ámelge asırılıp atırǵan bunday jumıslardıń maqseti – jergilikli xalıqtıń turmıs dárejesin arttırıw, orınlarda sociallıq xızmetler hám infrastrukturanı jetilistiriw arqalı olardıń turmısın jaqsılaw bolıp tabıladı.

Qaraqalpaqstan xabar agentligi