Sońǵı jılları Prezidentimizdiń ayrıqsha itibarı menen respublikamızda hár bir tarawdı rawajlandırıw boyınsha keń kólemli jumıslar alıp barılmaqta. Mámlekketimizde turizm tarawına tiyisli qabıl etilgen párman hám qararlardıń talaplarınıń orınlanıwı boyınsha jumıslar ámelge asırılmaqta. Sonday-aq, Prezidentimizdiń 2024-jıl 24-dekabr kúni Qaraqalpaqstan Respublikasında qosımsha imkaniyatlardı iske qosıp, investiciyanı kóbeytiw hám xalıqtıń bántligin arttırıw, 2025-jıldaǵı tiykarǵı wazıypalar boyınsha ótkergen májilisindede turizm tarawın rawajlandırıw boyınsha jáne de keń túrde toqtap ótken edi.

Házirgi waqıtta ekonomikanıń basqa tarmaqları qatarı turizm tarawı da rawajlanıp, mámleketimiz hám shet el sayaxatshılar aǵımın kóbeytiw boyınsha keń kólemli jumıslar ámelge asırılmaqta. Atap aytqanda, sayaxatshılıq obektleri infrastrukturası rawajlanıp, turistler ushın turar jaylar kóbeymekte: iri miymanxanalar, jataqxanalar hám shańaraqqa tiyisli qonaq úyleri menen bir qatarda jańa turistik jónelisler islep shıǵılıp atır. Turizm potencialın úgit-násiyatlaw maqsetinde Qıtay, Koreya, Belgiya, Rossiya, BAÁ, mámleketlerinde ótkerilgen xalıqaralıq kórgizbelerde aymaqtıń turizm potencialı kórsetildi. Ishki turizmdi ǵalabalastırıw boyınsha joybarlar ámelge asırılıp, shet el sayaxatshılar aǵımın kóbeytiw ilajları kórilmekte. Qaraqalpaqstan Respublikası Joqarǵı Kenesiniń Baslıǵı Amanbay Orınbaev basshılıǵındaǵı Qaraqalpaqstan delegaciyası Ras-al-Xayma Ámiri Shayx Saud bin Sakr Al Qosimiy menen ushırastı. Onda Qaraqalpaqstannıń jańa investiciyalıq joybarlardı ámelge asırıw baǵdarındaǵı hám ekonomikalıq potencialı, ózine tán geografiyalıq jaylasıwı, turizm, awıl xojalıǵı hám sanaat tarawındaǵı imkaniyatları atap ótildi. Sonday-aq áhmiyetli joybarlar ústinde sheriklik múnásibetlerin ornatıw boyınsha kelisip alındı hám 20 ǵa jaqın sırt el kompaniyaları menen 100 mln. dollarlıq eksport boyınsha shártnamalarǵa qol qoyıw boyınsha kelisimlerge erisildi. Sońǵı jılları elimizde turizmdi mámleketlik siyasattıń tiykarǵı baǵdarına aylandırıw arqalı sırt el investorları, ásirese arab mámleketleriniń investorları menen birge islesiw imkaniyatları keńeymekte. Ústirt platosı ekologiyalıq hám ekstremal turizm ushın júdá qolaylı bolıp, bul potenciallı investorlar ushın qızıqlı baǵdar bolıwı múmkin. Usı kózqarastan, Qaraqalpaqstanda etnoturizm, ekoturizm hám ekstremal turizm potencialın rawajlandırıw ayırıqsha áhmiyetke iye. Elimiz óziniń bay tariyxı hám mádeniy miyrasları menen turistler aǵımın tarta aladı. Usınıń menen birge, mádeniy miyraslar, arxeologiyalıq, tariyxıy esteliklerimiz, usı waqıtta aymaǵı ekologiyalıq krizis aymaǵına aynalǵan Aral teńizi de dúnya jámiyetshiliginiń dıqqatın ózine tartıp atır. Bul baǵdardaǵı ekoturizm Aral boyınıń turizm potencialın úgit-násiyatlawshı faktorlardan birine aylanıp atır. 2024- jılda Respublikamızǵa kelgen turistler sanı 2,2 milliondı quraǵan bolsa, sonnan 200 mıńı sırt elden kelgen turistlerdi quraǵan. Tiykarınan, 2025-jılda respublikaǵa kelgen turistler sanın 3 millionǵa, sonnan sırt elden kelgen turistler sanın 400 mıń, jergilikli turistler sanın 2,6 mıńǵa jetkeriw, turizm xızmetleri eksportın 50 mln dollarǵa jetkeriw rejelestirilgen. Húrmetli Prezidentimizdiń turizm hám mádeniyat tarawına qaratılǵan ayrıqsha itibarı nátiyjesinde qolaylı sharayatlar jaratılıp, elimizge keliwshi turistler sanı jıldan-jılǵa kóbeyip barmaqta. «BBC Travel» global media portalınıń maǵlıwmatlarına qaraǵanda, Ózbekstan 2025-jılı sayaxat etiw ushın eń jaqsı 25 baǵdar dizimine kirdi. Bunnan tısqarı, 90 nan artıq mámleket sonıń ishinde, Ullı Britaniya, Kanada hám Avstraliya puqaraları Ózbekstanǵa vizasız keliwi múmkin ekenligi sayaxattı sezilerli dárejede ańsatlastıradı hám turistler ushın jańa imkaniyatlar esigin ashadı.

S. Sulaymanov, t.i.d (DSc) docent.
M.Kaypova, PhD.
Qaraqalpaqsatan xabar agentligi