Taxtakópir rayonında jeńil atletika boyınsha 15-17 jastaǵı jas óspirimler arasında «Jańa Ózbekstan Olimpiada shoqqıları» sport jarıslarınıń aymaqlıq basqıshı bolıp ótti.

Jarısqa Taxtakópir, Qaraózek, Kegeyli, Shımbay hám Bozataw rayonlarınan jas atletler qatnastı, bir qatar baǵdarlar boyınsha óz-ara keskin gúres alıp bardı.
Qızıqlı ótken bellesiwler juwmaǵında, maydan iyeleri esaplanǵan taxtakópirli sportshılar óz qarsılaslarınan basım kelip, kópshilik baǵdarlar boyınsha jeńimpazlıqtı qolǵa kirgizdi.
Atap aytqanda, yadro ılaqtırıw boyınsha erler arasında Asılbek Polatbekov, qızlar arasında Gúldana Ómirbaeva, nayza ılaqtırıw boyınsha Jasurbek Polatbekov, 100 metrge qızlar arasında tosıqlar asa juwırıwda Aysara Bazarbaeva, uzınlıqqa sekiriwde qızlar arasında Jasmina Sheripbaeva, erler arasında Atabek Nazarovlar birinshi orındı iyelep, altın medal iyesine aylandı.
Biyiklikke sekiriwde erler arasında qaraózekli Babayar Berdixanov, qızlar arasında bozatawlı Balawsa Orazbaeva, úsh atlap sekiriwde erler arasında Aybek Abdullaev, qızlar arasında shımbaylı Jipek Lepesova hám nayza ılaqtırıwda qızlar arasında qaraózekli Albina Aralbaevalar jeńimpazlıqtı qolǵa kirgizdi.
Ótkerilgen jarıs sońında jeńimpazlar shólkemlestiriwshiler tárepinen diplom, medal hám estelik sawǵalar menen sıylıqlanıp, «Jańa Ózbekstan Olimpiada shoqqıları» sport jarıslarınıń Qaraqalpaqstan Respublikalıq basqıshına jollamanı qolǵa kirgizdi.

Adilbay Orazov,
Qaraqalpaqstan xabar agentligi sholıwshısı