Qaraqalpaqstan Respublikası Joqarǵı Keńesiniń Baslıǵı A.Orınbaev Xalıqaralıq Jasıl klimat fondınıń atqarıwshı direktorı Mafalda Duarte menen ushırastı.

Joqarǵı Keńes Baslıǵı basshılıǵındaǵı delegaciyanıń Koreya mámleketine saparı dawamında fond penen jaqın sheriklikti ornatıw hám birge islesiw boyınsha kelisip alınıp, fond wákilleri Qaraqalpaqstanǵa mirát etilgenin atap ótiw orınlı. Bul ushırasıw mine usı ornatılǵan qatnasıqlardı bekkemlew baǵdarındaǵı áhmiyetli adımlardıń biri esaplanadı.
Ótkerilgen ushırasıwda sońǵı jılları Prezidentimizdiń basshılıǵında Aralboyı regionın rawajlandırıw, aymaqtaǵı ekologiyalıq apatshılıq aqıbetlerin jumsartıw, puqaralardıń turmıs abadanlıǵın támiyinlew baǵdarında ámelge asırılıp atırǵan jumıslar keń túrde sóz etildi.
Sonday-aq, Aralboyı regionında xalıqtıń jasaw sharayatın jaqsılaw, ekologiyalıq tásirlerdi jumsartıw maqsetinde xalıqaralıq donor shólkemleriniń grant qarjıların tartıw, regionda ekologiyalıq jaǵdaydı jaqsılaw boyınsha birge islesiwshilerdiń tájiriybesi tiykarında innovaciyalıq sheshimlerdi tabıw máseleleri haqqında sóz bardı.
Óz gezeginde miymanlar jıllı júzlilik penen kútip alǵanı ushın respublika basshılarına minnetdarshılıǵın bildirdi hám birge islesiwdi ele de keńeytiw, bar múmkinshiliklerden nátiyjeli paydalanıw, grant qarjıların tartıw boyınsha óz-ara baylanıslardı ele de bekkemlew baǵdarında pikirlerin bildirdi.
Ushırasıw juwmaǵında Joqarǵı Keńes Baslıǵı birge islesiwdi ele de keńeytiw baǵdarında barqulla pikirlesiwge tayar ekenligi hám hár qanday baslamalar qollap-quwatlanatuǵınlıǵın atap ótti.
Soń Xalıqaralıq Jasıl klimat fondınıń wákilleri bul baǵdarda respublikamızda ámelge asırılıp atırǵan joybarlar menen tanıstı.

Qaraqalpaqstan xabar agentligi.